យោធាអ៊ីស្រាអែល បានប្រាប់ឲ្យដឹងថា ខ្លួនបានស្ទាក់ចាប់មីស៊ីលដែលបាញ់ចេញពីប្រទេសយេម៉ែន នៅព្រឹកថ្ងៃព្រហស្បតិ៍ (ទី២០ ខែមីនា) នេះ ខណៈដែលអរិភាពជាមួយក្រុមសកម្មប្រយុទ្ធហ៊ួទីគាំទ្រដោយអ៊ីរ៉ង់ ឡើងកម្ដៅកាន់តែខ្លាំងឡើងៗ។

យោធាបានឲ្យដឹងថា សំឡេងស៊ីរ៉ែនបានបន្លឺឡើងនៅក្នុងតំបន់ជាច្រើនក្នុងប្រទេសអ៊ីស្រាអែល បន្ទាប់ពីមានការបាញ់គ្រាប់រ៉ូកែត។ នគរបាលអ៊ីស្រាអែលបានប្រាប់ថា ស៊ីរ៉ែនត្រូវបានគេឮ នៅក្នុងទីក្រុង Tel Aviv និង Jerusalem។ សេវារថយន្តសង្គ្រោះរបស់អ៊ីស្រាអែល បាននិយាយថា គ្មានការរាយការណ៍ពីអ្នករងរបួសធ្ងន់ធ្ងរនោះទេ។

ក្រុមសកម្មប្រយុទ្ធហ៊ួទីរបស់ប្រទេសយេម៉ែន ដែលមិនទាន់បានអះអាងទទួលខុសត្រូវ ចំពោះការវាយប្រហារដោយមីស៊ីលនេះ ហាក់ដូចជាមិនទាន់បង្ហាញនូវភាពចលាចល ដោយសារការវាយប្រហារជាបន្តបន្ទាប់របស់សហរដ្ឋអាមេរិកដែលបានចាប់ផ្ដើមតាំងពីថ្ងៃសៅរ៍ចុងសប្ដាហ៍កន្លងមក ហើយថែមទាំងបានប្តេជ្ញាថា នឹងបង្កើនការវាយប្រហាររបស់ពួកគេ ក្នុងនោះរួមទាំងដាក់គោលដៅទៅលើអ៊ីស្រាអែល ជាការឆ្លើយតបនឹងយុទ្ធនាការរបស់សហរដ្ឋអាមេរិក។

គួរបញ្ជាក់ថា ការវាយប្រហាររបស់សហរដ្ឋអាមេរិក ដោយសារការវាយប្រហាររបស់ក្រុមហ៊ួទីលើការដឹកជញ្ជូន នៅសមុទ្រក្រហម គឺជាប្រតិបត្តិការយោធាដ៏ធំបំផុតរបស់សហរដ្ឋអាមេរិក នៅតំបន់មជ្ឈិមបូព៌ា គិតចាប់តាំងពី លោកប្រធានាធិបតី Donald Trump ចូលកាន់តំណែងក្នុងខែមករា។ ការវាយប្រហាររបស់សហរដ្ឋអាមេរិក បានសម្លាប់មនុស្សយ៉ាងហោចណាស់ ៣១នាក់។

ជាមួយគ្នានេះ លោក Trump ក៏បានគំរាមឲ្យអ៊ីរ៉ង់ទទួលខុសត្រូវ ចំពោះការវាយប្រហារណាមួយរបស់ក្រុមហ៊ួទី នាពេលអនាគត ដោយព្រមានពីការប្រឈមនឹងផលវិបាកធ្ងន់ធ្ងរ៕