ប្រធានាធិបតីអាមេរិក លោក Donald Trump កាលពីថ្ងៃពុធ (ទី១៩ ខែមីនា) បានប្រាប់សមភាគីអ៊ុយក្រែន លោក Volodymyr Zelensky ថា សហរដ្ឋអាមេរិកអាចគ្រប់គ្រង និងដំណើរការរោងចក្រថាមពលនុយក្លេអ៊ែររបស់អ៊ុយក្រែន ដែលជាផ្នែកមួយនៃកិច្ចប្រឹងប្រែងចុងក្រោយបំផុតរបស់លោក ដើម្បីធានាបានបទឈប់បាញ់ នៅក្នុងការលុកលុយរបស់រុស្ស៊ីលើប្រទេសជិតខាង។

លោក Zelensky បាននិយាយបន្ទាប់ពីការអំពាវនាវថា ទីក្រុងគីវបានត្រៀមខ្លួនជាស្រេច ក្នុងការផ្អាកវាយប្រហារបណ្តាញថាមពល និងហេដ្ឋារចនាសម្ព័ន្ធរបស់រុស្ស៊ី ពោលគឺមួយថ្ងៃបន្ទាប់ពីមេដឹកនាំរុស្ស៊ី លោក Vladimir Putin បានយល់ព្រមបញ្ឈប់ការវាយប្រហារស្រដៀងគ្នានេះលើអ៊ុយក្រែន។ ហើយលោក Zelensky ក៏បានប្រាប់ទៀតដែរថា លោកបានពិភាក្សា អំពីផែនការគ្រប់គ្រងរោងចក្រថាមពលរបស់លោក Trump។

ក្នុងអំឡុងពេលធ្វើសន្និសីទសារព័ត៌មានតាមអ៊ីនធឺណិត ដោយសំដៅទៅលើរោងចក្រនៅតំបន់ Zaporizhzhia លោក Zelensky ដែលកំពុងបំពេញទស្សនកិច្ចជាផ្លូវការនៅប្រទេសហ្វាំងឡង់ បាននិយាយថា៖ «យើងបានពិភាក្សាអំពីរោងចក្រថាមពលតែមួយដែលស្ថិតក្រោមការកាន់កាប់របស់រុស្ស៊ី»។

លោកបានបន្ថែមថា លោកមិនមានអារម្មណ៍ថា មានសម្ពាធណាមួយពីលោក Trump នោះឡើយ ក្នុងការធ្វើសម្បទានទៅឲ្យរុស្ស៊ី។ សម្ដីរបស់លោក Trump ពីគណបក្សសាធារណរដ្ឋ មានភាពវិជ្ជមានគួរឲ្យកត់សម្គាល់ បន្ទាប់ពីមានការជជែកតាមទូរសព្ទជាមួយលោក Zelensky ដោយសេតវិមានបានពណ៌នាថា វាជាការសន្ទនា «ដ៏អស្ចារ្យ» បើទោះបីជាមេដឹកនាំទាំង២ ទើបមានជម្លោះគ្នាយ៉ាងក្ដៅគគុក នៅក្នុងការិយាល័យ Oval Office ថ្មីៗនេះក៏ដោយ។

ទីប្រឹក្សាសន្តិសុខជាតិ លោក Mike Waltz និងរដ្ឋមន្ត្រីការបរទេស លោក Marco Rubio បានលើកឡើងនៅក្នុងសេចក្តីថ្លែងការណ៍រួមមួយថា លោក Trump «បានពិភាក្សាអំពីការផ្គត់ផ្គង់អគ្គិសនី និងរោងចក្រថាមពលនុយក្លេអ៊ែររបស់ប្រទេសអ៊ុយក្រែន» ហើយបានបញ្ជាក់ថា ទីក្រុងវ៉ាស៊ីនតោនអាច «ទទួលបានប្រយោជន៍" ក្នុងការគ្រប់គ្រងរោងចក្រនេះ៕