ប្រព័ន្ធផ្សព្វផ្សាយរបស់សហរដ្ឋអាមេរិក រាយការណ៍ថា មន្ទីរបញ្ចកោណ កំពុងពិចារណាបញ្ឈប់ការបន្ថែមយោធាអាមេរិក ដែលមានមូលដា្ឋននៅក្នុងប្រទេសជប៉ុន ខណៈរដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ មានចំណាត់ការកាត់បន្ថយរដ្ឋាភិបាលសហព័ន្ធ។ ប្រព័ន្ធផ្សព្វផ្សាយCNN បានរាយការណ៍កាលពីថ្ងៃពុធ ដោយដកស្រង់សម្តីមន្ត្រីការពារជាតិអាមេរិក និងឯកសារសង្ខេបដែលប្រព័ន្ធផ្សព្វផ្សាយនេះទទួលបាន។

ឯកសារ និយាយថា ការបញ្ឈប់ការបន្ថែមកងកម្លាំងរបស់សហរដ្ឋអាមេរិកតាមផែនការនៅប្រទេសជប៉ុន អាចសន្សំប្រាក់បានប្រហែល១,១ពាន់លានដុល្លារ ប៉ុន្តែក៏អាចបង្កើត «ហានិភ័យនយោបាយ» សម្រាប់សហរដ្ឋអាមេរិកនៅក្នុងប្រទេសជប៉ុន និងកាត់បន្ថយវិសាលភាពនៃទីបញ្ជាការ និងការគ្រប់គ្រងនៅតំបន់មហាសមុទ្រប៉ាស៊ីហ្វិក។

សហរដ្ឋអាមេរិក កំពុងរៀបចំផែនការបង្កើតកងកម្លាំងរបស់ខ្លួនឡើងវិញ នៅក្នុងប្រទេសជប៉ុន ជាទីបញ្ជាការកណ្តាលនៃកងកម្លាំងរួម ដើម្បីផ្តល់លទ្ធភាពឱ្យមានការសម្របសម្រួលកាន់តែប្រសើរ ជាមួយកងកម្លាំងស្វ័យការពាររបស់ប្រទេសជប៉ុន។ រដ្ឋបាល របស់លោកTrump កំពុងពិនិត្យមើលឡើងវិញការរៀបចំ និងរចនាសម្ព័ន្ធរបស់រដ្ឋាភិបាលសហព័ន្ធ ជាមួយនឹងជម្រើសជាច្រើន រួមមានទាំងការកាត់បន្ថយ ឬ រុះរើទីភ្នាក់ងារ និងក្រសួងនានា។

ក្រសួងការពារជាតិអាមេរិក បានបង្ហាញថា ក្រសួងនឹងធ្វើការដើម្បីធ្វើឱ្យប្រសើរដោយសហការជាមួយក្រសួងប្រសិទ្ធភាពរដ្ឋាភិបាល។ ស្ថាប័នដែលដឹកនាំដោយ លោក Elon Musk មួយនេះ មានភារកិច្ចស្វែងរកវិធីកាត់បន្ថយការចំណាយរបស់រដ្ឋាភិបាល។