នគរបាលនៅរដ្ឋ Punjab ភាគខាងជើងនៃប្រទេសឥណ្ឌា កាលពីយប់ថ្ងៃពុធ (១៩ មីនា) បានឃុំខ្លួនកសិកររាប់រយនាក់ និងបានប្រើប្រាស់គ្រឿងចក្រឈូសឆាយដើម្បីកម្ទេចជំរំបណ្តោះអាសន្នរបស់ពួកគេនៅក្នុងតំបន់ព្រំដែន ដែលបានបង្កើតឡើងដើម្បីតវ៉ាអស់រយៈពេលជាងមួយឆ្នាំ ទាមទារឱ្យតម្លៃដំណាំប្រសើរជាងមុន។

គួរឱ្យដឹងថា កសិករបានបោះជំរំតវ៉ានៅតាមព្រំដែនជាប់នឹងតំបន់ Haryana ចាប់តាំងពីខែកុម្ភៈ ឆ្នាំមុនមក នៅពេលដែលកងកម្លាំងសន្តិសុខបានបញ្ឈប់ការហែក្បួនបាតុកម្មរបស់ពួកគេឆ្ពោះទៅកាន់រដ្ឋធានីញូវដេលី ដើម្បីទាមទារការធានាស្របច្បាប់ នៃការគាំទ្រពីរដ្ឋបន្ថែមទៀតសម្រាប់តម្លៃដំណាំ។

រូបភាពទូរទស្សន៍បានបង្ហាញពីនគរបាលប្រើគ្រឿងចក្រឈូសឆាយដើម្បីវាយកម្ទេចតង់ និងឧបករណ៍សម្រាប់តវ៉ា ខណៈនាំខ្លួនកសិករ ដែលកំពុងស្ពាយរបស់របរផ្ទាល់ខ្លួន ទៅកាន់យានយន្ត។ លោក Nanak Singh មន្ត្រីនគរបាលជាន់ខ្ពស់បានប្រាប់ពីសកម្មភាពបោសសម្អាតកាលពីយប់ថ្ងៃពុធថា "មន្រ្តីមិនចាំបាច់ប្រើកម្លាំងទេ ពីព្រោះមិនមានការតស៊ូពីប្រជាកសិករឡើយ"។

ការតវ៉ាបែបនេះមិនមែនទើបតែកើតឡើងទេ ខណៈរដ្ឋាភិបាលរបស់លោកនាយករដ្ឋមន្ត្រី Narendra Modi ត្រូវបានបង្ខំឱ្យលុបចោលច្បាប់កសិកម្មមួយចំនួនកាលពីឆ្នាំ២០២១ បន្ទាប់ពីការតវ៉ារយៈពេលមួយឆ្នាំដោយកសិករ នៅពេលពួកគេបោះជំរំខាងក្រៅទីក្រុងដេលី អស់ជាច្រើនខែ៕