អគ្គលេខាធិការអង្គការសហប្រជាជាតិ (UN) បានថ្កោលទោសការវាយប្រហារ កាលពីថ្ងៃពុធ (ទី១៩ ខែមីនា) លើបុគ្គលិករបស់ស្ថាប័នខ្លួន ហើយបានបន្ថែមនៅក្នុងសេចក្តីថ្លែងការណ៍មួយតាមរយៈអ្នកនាំពាក្យរបស់លោកថា គ្រប់ភាគីនៅក្នុងការវាយប្រហាររបស់អ៊ីស្រាអែលលើតំបន់ហ្កាហ្សា បានដឹងពីទីកន្លែងដែល UN តាំងនៅ។

អ្នកនាំពាក្យរបស់លោកអគ្គលេខាធិការ Antonio Guterres បានសរសេរថា៖ «លោកអគ្គលេខាធិការ មានការសោកស្ដាយ និងតក់ស្លុតជាខ្លាំងដែលបានដឹងពីមរណភាពរបស់បុគ្គលិកការិយាល័យអង្គការសហប្រជាជាតិទទួលបន្ទុកសេវាកម្មគម្រោង នៅពេលដែលផ្ទះសំណាក់របស់អង្គការសហប្រជាជាតិចំនួន ២ នៅទីក្រុង Deir al Balah ត្រូវរងគ្រោះដោយការវាយប្រហារ»។

សេចក្តីថ្លែងការណ៍នោះបានបន្តថា៖ «ទីតាំងនៃបរិវេណរបស់អង្គការសហប្រជាជាតិទាំងអស់ ត្រូវបានដឹងគ្រប់គ្នា ដែលភាគីពាក់ព័ន្ធជម្លោះទាំងអស់ ត្រូវបានចងដោយច្បាប់អន្តរជាតិ ដើម្បីឲ្យការពារពួកគេ និងរក្សាភាពមិនអាចរំលោភបំពានបានជាដាច់ខាតរបស់ពួកគេ»។

លោកបានបន្ថែមថា «លោកអគ្គលេខាធិការ សូមចូលរួមរំលែកទុក្ខយ៉ាងក្រៀមក្រំបំផុត ចំពោះក្រុមគ្រួសារនៃបុគ្គលិកដែលត្រូវបានសម្លាប់» ដោយលោកបន្ថែមថា យ៉ាងហោចណាស់បុគ្គលិក UN ចំនួន ២៨០នាក់ត្រូវបានសម្លាប់ នៅតំបន់ហ្កាហ្សា ចាប់តាំងពីថ្ងៃទី៧ ខែតុលា ឆ្នាំ២០២៣៕