ប្រព័ន្ធផ្សព្វផ្សាយរដ្ឋគុយបា កាលពីថ្ងៃពុធ (ទី១៩ ខែមីនា) បានអបអរសាទរ ចំពោះការសម្រេចរបស់រដ្ឋបាល លោក Donald Trump ក្នុងការបិទប្រព័ន្ធផ្សព្វផ្សាយផ្តល់មូលនិធិដោយសហរដ្ឋអាមេរិក ដែលត្រូវបានប្រកាសជាយូរមកហើយថា ជាមូលដ្ឋានគ្រឹះនៃកិច្ចប្រឹងប្រែងរបស់ទីក្រុងវ៉ាស៊ីនតោន ក្នុងការផ្សាយទស្សនៈរបស់ខ្លួន នៅក្នុងប្រទេសគុយបាដែលគ្រប់គ្រងដោយលទ្ធិកុម្មុយនីស្ត។

សូមបញ្ជាក់ថា ប្រធានាធិបតីអាមេរិក លោក Trump បានចេញបទបញ្ជាមួយកាលពីសប្តាហ៍មុន ឲ្យកាត់បន្ថយយ៉ាងយ៉ាងធំសម្បើមនូវទីភ្នាក់ងារសហរដ្ឋអាមេរិក សម្រាប់ប្រព័ន្ធផ្សព្វផ្សាយសកល (USAGM) ជាប្រតិបត្តិការមានមូលនិធិជិត ១ពាន់លានដុល្លារអាមេរិក ដែលគ្រប់គ្រងការផ្សាយព័ត៌មានជា ៥០ភាសា។

ក្នុងចំណោមសេវាកម្មព័ត៌មានដែលរងផលប៉ះពាល់ជាសកល ការកាត់បន្ថយនេះបានបិទការិយាល័យផ្សាយគុយបា (OCB) គឺវិទ្យុម៉ាទី (Radio Marti) និងកម្មវិធីផ្សាយអនឡាញ Noticias Marti ដែលបេសកកម្មរបស់ប្រព័ន្ធផ្សព្វផ្សាយទាំងនេះ បើយោងតាមគេហទំព័ររបស់ខ្លួន គឺដើម្បីផ្តល់ឲ្យ «ប្រជាជនគុយបានូវព័ត៌មាន និងដំណឹងដោយគ្មានការត្រួតពិនិត្យ»។

ទីភ្នាក់ងារសារព័ត៌មានរដ្ឋគុយបា Cubadebate បានអបអរសាទរ ចំពោះការសម្រេចរបស់លោក Trump ដោយហៅកម្មវិធីរបស់ប្រព័ន្ធផ្សព្វផ្សាយទាំងនេះថា ជា «គម្រោងទំនាក់ទំនងមានតមលសថ្លៃ បរាជ័យ និងពុករលួយបំផុត ក្នុងប្រវត្តិសាស្ត្រសហរដ្ឋអាមេរិក»។ ការព្យាយាមទាក់ទងទៅការិយាល័យផ្សាយគុយបា និងវិទ្យុម៉ាទី (Radio Marti) ដែលឥឡូវនេះបិទការផ្សាយហើយនោះ មិនទទួលបានជោគជ័យឡើយ។

សេតវិមានមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ តែលោកស្រី Kari Lake ដែលត្រូវបានតែងតាំងដោយលោក Trump ឲ្យទទួលបន្ទុកត្រួតពិនិត្យលើប្រព័ន្ធផ្សព្វផ្សាយនានារបស់ USAGM ក្នុងនោះមានទាំងវិទ្យុផ្សាយសំឡេងសហរដ្ឋអាមេរិក និងវិទ្យុអឺរ៉ុបអឺរ៉ុបសេរីផងដែរនោះ បានពណ៌នាពី USAGM ថា ជា «ករណីស្អុយរលួយ និងជាបន្ទុកដ៏ធំ សម្រាប់អ្នកបង់ពន្ធអាមេរិក» ហើយ «មិនអាចសង្គ្រោះវិញបានឡើយ»៕