អមដោយការបន្ថែមថា ការឆ្លើយតបនឹងមានឆាប់ៗនេះ រដ្ឋមន្ត្រីការបរទេសអ៊ីរ៉ង់ លោក Abbas Araqchi នៅថ្ងៃព្រហស្បតិ៍ (ទី២០ ខែមីនា) នេះ បាននិយាយថា ប្រទេសអ៊ីរ៉ង់នឹងពិចារណាទាំង «ឱកាស» ក៏ដូចជាការគំរាមកំហែង នៅក្នុងលិខិតរបស់ប្រធានាធិបតីអាមេរិក Donald Trump ជាសារដែលបានជំរុញឲ្យទីក្រុងតេអេរ៉ង់ឈានដល់កិច្ចព្រមព្រៀងនុយក្លេអ៊ែរថ្មី។

មេដឹកនាំកំពូលរបស់អ៊ីរ៉ង់ លោក Ayatollah Ali Khamenei បានបដិសេធលិខិតរបស់លោក Trump កាលពីសប្តាហ៍មុនថា ជាការបោកបញ្ឆោត ដោយលើកឡើងថា ការទាមទារដ៏ហួសហេតុរបស់លោក Trump នឹង «រឹតបន្តឹងចំណងទណ្ឌកម្ម និងបង្កើនសម្ពាធលើប្រទេសអ៊ីរ៉ង់»។ ប៉ុន្តែលោក Araqchi បាននិយាយថា ទីក្រុងតេអេរ៉ង់ នៅតែវាយតម្លៃលិខិតនោះ និងថ្លឹងថ្លែង ចំពោះការឆ្លើយតបរបស់ខ្លួន។

លោក Araqchi បាននិយាយថា៖ «លិខិតរបស់លោក Trump គឺជាការគំរាមកំហែងច្រើនជាង ប៉ុន្តែអះអាងថា ក៏មានឱកាសដែរ។ យើងបានយកចិត្តទុកដាក់លើចំណុចទាំងអស់ ដែលមាននៅក្នុងលិខិតនោះ ហើយនឹងពិចារណាទាំងការគំរាមកំហែង និងឱកាស សម្រាប់ការឆ្លើយតបរបស់យើង។ វាមានឱកាសនៅពីក្រោយការគំរាមកំហែងទាំងអស់»។

កាលពីថ្ងៃពុធ (ទី១៩ ខែមីនា) សារព័ត៌មាន Axios បានរាយការណ៍ថា លិខិតរបស់លោក Trump បានទុករយៈពេលកំណត់ឲ្យអ៊ីរ៉ង់ ២ខែ ក្នុងការឈានដល់កិច្ចព្រមព្រៀងនុយក្លេអ៊ែរ ឬបើមិនដូច្នោះទេ ត្រូវប្រឈមនឹងការដាក់ទណ្ឌកម្មកាន់តែតឹងរ៉ឹងជាងមុន ក្រោមយុទ្ធនាការ «ដាក់សម្ពាធអតិបរមា» ជាថ្មីរបស់លោកប្រធានាធិបតីអាមេរិក។

លោក Araqchi បានបញ្ជាក់បន្ថែមថា ទីក្រុងតេអេរ៉ង់ នឹងឆ្លើយតប ចំពោះលិខិតរបស់លោក Trump នៅប៉ុន្មានថ្ងៃខាងមុខ តាមរយៈបណ្តាញសមស្រប ដោយបដិសេធមិនមានការចរចាដោយផ្ទាល់ណាមួយឡើយ ដរាបណាទាល់តែទីក្រុងវ៉ាស៊ីនតោន លុបបំបាត់ «សម្ពាធ ការគំរាមកំហែង និងការដាក់ទណ្ឌកម្ម»៕