នៅថ្ងៃព្រហស្បតិ៍នេះ ទាហានកូរ៉េខាងត្បូង និងសហរដ្ឋអាមេរិក បានធ្វើសមយុទ្ធឆ្លងកាត់ទន្លេរួមគ្នានៅទីក្រុង Yeoncheonដែលមានចម្ងាយប៉ុន្មានគ.មប៉ុណ្ណោះពីតំបន់គ្មានកងទ័ពរវាងកូរ៉េខាងត្បូង និងកូរ៉េខាងជើង ដើម្បីធ្វើឲ្យល្អប្រសើរឡើងប្រតិបត្តិការយោធារួមបញ្ចូលរបស់ពួកគេ ។

 រថក្រោះបានបើកឆ្លងកាត់ទន្លេ ក្រោយទាហានប្រទេសទាំង ២ធ្វើស្ពានអណ្តែតបណ្តោះអាសន្ន ។ យោធានិយាយថា ទាហានសហរដ្ឋអាមេរិក និងទាហានកូរ៉េខាងត្បូងប្រហែល ៦០០នាក់ បានចូលរួមសមយុទ្ធរយៈពេល ៦ថ្ងៃ នៅជុំវិញទន្លេ Imjin ខណៈគ្រឿងយុទ្ធោបករណ៍ ១០០គ្រឿង រួមទាំងឧទ្ធម្ភាគចក្រ និងរថក្រោះ ត្រូវបានចល័តសម្រាប់សមយុទ្ធនេះ ។

 សមយុទ្ធឆ្លងទន្លេ គឺជាផ្នែកមួយនៃសមយុទ្ធយោធាប្រចាំឆ្នាំទ្រង់ទ្រាយធំជាងមុន “Freedom Shield”រវាងកូរ៉េខាងត្បូង និងសហរដ្ឋអាមេរិក ដែលបានចាប់ផ្តើមកាលពីថ្ងៃទី ១០ ខែមីនាកន្លងទៅ បើទោះបីជាសមយុទ្ធបាញ់គ្រាប់ពិត ត្រូវបានផ្អាកក៏ដោយ បន្ទាប់ពីយន្តហោះចម្បាំងកូរ៉េខាងត្បូង ទម្លាក់គ្រាប់ច្រឡំលើទីក្រុងស៊ីវិលជិតព្រំដែនកូរ៉េខាងជើង កាលពីដើមខែនេះ បណ្តាលឲ្យមនុស្ស ២៩នាក់ រងរបួស ។

 កូរ៉េខាងជើងតែងតែទាមទារឲ្យបញ្ឈប់សមយុទ្ធយោធារួមគ្នាសហរដ្ឋអាមេរិក-កូរ៉េខាងត្បូង និងបានចាត់ទុកវាថា ការចាប់ផ្តើមឲ្យមានការឈ្លានពាន ។

 យោធាកូរ៉េខាងត្បូង និយាយថា សមយុទ្ធយោធារួមគ្នានេះ មានគោលដៅពង្រឹងការត្រៀមខ្លួនរបស់សម្ព័ន្ធក្នុងការប្រឈមជាមួយការគំរាមកំហែង ដូចជាកូរ៉េខាងជើង ៕