ដោយមានអាយុកាលរាប់សតវត្សរ៍ វិហារ al-Khairat ស្ថិតក្នុងទីក្រុងបាដាដ ប្រទេសអ៊ីរ៉ាក់ បានផ្តល់អាហារដល់អ្នកត្រូវការ ជាមួយរូបមន្តស៊ុបពិសេសដែលមនុស្សមានជំនឿថា អាចព្យាបាលបេះដូង និងព្រលឹងវិញ្ញាណរបស់ពួកគេ ។

លោក Saad Jassim ដែលបម្រើការជាចុងភៅអស់រយៈពេល ៣២ឆ្នាំមកហើយនោះ ពន្យល់ថា ដោយក្រុមស្ម័គ្រចិត្តចម្អិន និងរៀបចំអាហារពេលល្ងាច(Iftar)គ្មានការឈប់សម្រាក អំឡុងពិធីបុណ្យ Ramadanនោះ វិហារ al-Khairat បានក្លាយជាស្ថាប័នមួយទាក់ទាញភ្ញៀវយ៉ាងច្រើន ។

លោក Jassim បន្តថា ការផ្តល់មូលនិធិសម្រាប់អាហារទាំងនេះ ភាគច្រើនទទួលបានពីការបរិច្ចាគ និងមូលនិធិផ្តល់ជូនដោយក្រុមមន្រ្តីទទួលបន្ទុករដ្ឋបាលទីសក្ការៈបូជារបស់រដ្ឋបុរស Sheikh Abdul Qadir Al-Kilani ។

កាលពីរយៈពេលជិត ១ពាន់ឆ្នាំមុន រដ្ឋបុរស Sheikh Abdul Qadir Al-Kilani បានបង្កើតផ្ទះបាយស៊ុប រៀបចំ និងចែកចាយស៊ុបដល់សិស្សសាលា ក៏ដូចជាជនក្រីក្រ និងអ្នកដំណើរ ។

ពលរដ្ឋអ៊ីរ៉ាក់ម្នាក់ដែលឈរតម្រង់ជួរទទួលយកចំណែកស៊ុបរបស់លោកនិយាយថា មកទល់នឹងពេលនេះ រូបមន្តស៊ុបរបស់លោក បានក្លាយជាការនិទានតៗគ្នា ក្នុងនោះមនុស្សដែលមានប្រវត្តិធ្លាប់ទទួលទាន មកទីនេះដើម្បីទទួលបានអត្ថប្រយោជន៍ ដោយជឿថា ពួកគេនឹងទទួលបានពរពីព្រះ ។

ពេលថ្ងៃរៀបលេច ហើយអាហារពេលល្ងាចជិតមកដល់ ពលរដ្ឋអ៊ីរ៉ាក់ ជួបជុំគ្នានៅទីធ្លាក្នុងវិហារ al-Qadiriyya ដែលមានទីសក្ការៈបូជារបស់បុរសរដ្ឋ Sheikh Abdul Qadir Al-Kilani ដើម្បីទទួលបានអាហារ ក៏ដូចជាទទួលបានបរិយាកាសសប្បាយរីករាយ អំឡុងពិធីបុណ្យតមអាហារ Ramadan ៕