ភ្នំពេញ៖ សម្តេចតេជោ ហ៊ុន សែន ប្រមុខរដ្ឋស្តីទី និងជានាយឧត្តមសេនីយ៍ផុតលេខផ្កាយមាស៥ បានឆ្លើយតបទៅ នឹងចម្ងល់មួយចំនួន ជុំវិញបំពាក់ឋានន្តរសក្តិនាយឧត្តមសេនីយ៍ផុតលេខ​ផ្កាយមាស​៥ជូនសម្តេចពិជ័យសេនា ទៀ បាញ់ និងសម្តេចកិត្តិសង្គហបណ្ឌិត​ ម៉ែន​ សំអន​ ហើយហេតុអ្វី​មិនបំពាក់ជូនសម្តេច ​ស ខេង ផងដែរនោះ ត្រូវបានសម្តេចតេជោ លើកឡើងថា សម្តេច ស ខេង គឺជាមន្រ្តីស៊ីវិល មិនមានក្របខណ្ឌជាយោធានោះឡើយ។

ថ្លែងពិធីបំពាក់ឋានន្តរសក្តិ ថ្នាក់នាយឧត្តមសេនីយ៍ផុតលេខផ្កាយមាស៥ ​ជូនសម្ដេចពិជ័យសេនា ទៀ បាញ់ និងសម្ដេច ម៉ែន សំអន នាព្រឹកថ្ងៃទី២១ ខែមីនា ឆ្នាំ២០២៥នេះ ​សម្តេចតេជោ ហ៊ុន សែន បានលើកឡើងថា មានគេខាំមិនថា ហេតុអ្វីមិនបំពាក់ផ្កាយ៥ ជូនសម្តេចក្រឡាហោម ស ខេង ដែរ ហើយសម្តេច បានខាំមិនពន្យល់វិញថា សម្តេច ស ខេង អតីតរដ្ឋមន្រ្តីក្រសួងមហាផ្ទៃ ​គឺស្ថិតនៅ ក្នុងក្របខណ្ឌស៊ីវិល តែប៉ុណ្ណោះ»។

សូមបញ្ជាក់ថា បើគិតរហូតដល់ពេលនេះ​ ប្រទេសកម្ពុជា​គឺ​មាន​ឥស្សរជន​ចំនួន៥រូបហើយ ដែល​ទទួល​បាន​ឋានន្តរសក្តិជានាយឧត្តមសេនីយ៍ផុតលេខផ្កាយមាស៥ ​ក្នុងនោះមាន​សម្តេចអគ្គមហាធម្មពោធិសាល ជា ស៊ីម អតីតប្រធានព្រឹទ្ធសភាកម្ពុជា សម្តេច​អគ្គមហាពញាចក្រី ហេង ​សំរិន ​អតីតប្រធានរដ្ឋសភា ​សម្តេចអគ្គមហាសេនាបតីតេជោ ហ៊ុន សែន អតីត​នាយករដ្ឋមន្រ្តី​នៃកម្ពុជា ​និងបច្ចុប្បន្នជាប្រធាន​ ព្រឹទ្ធសភា និងប្រមុខរដ្ឋ ​និងពីររូបទៀត​ដែលទើប​តែងតាំង​ គឺ​សម្តេច ពិជ័យសេនា ទៀ បាញ់ អតីតរដ្ឋមន្រ្តីក្រសួងការពារជាតិ​ និងសម្តេចកិត្តិសង្គហបណ្ឌិត​ ម៉ែន សំអន អតីតរដ្ឋមន្រ្តីទំនាក់ទំនង ​រដ្ឋសភាព្រឹទ្ធនិងអធិការកិច្ច។

បើ​តាមសម្តេចតេជោ ​ហ៊ុន សែន ​បានលើកលឡើងថា​ សម្តេចពិតជាមានមោទនភាព​យ៉ាងខ្លាំង ក្រោយ​ព្រះមហាក្សត្រ​ប្រោសព្រះរាជទាន​ផ្តល់​ឋានន្តរសក្តិថ្នាក់ ​នាយ​ឧត្តមសេនីយ៍ផុត លេខ​ផ្កាយមាស ៥ជូនដល់សម្តេចពិជ័យសេនា ទៀ បាញ់ ​និង​សម្តេចសង្គហបណ្ឌិត ​ម៉ែន​ សំអន នាពេលនេះ គឺពិតសាកសមនឹងទទួល ​ខណៈលោកទាំងពីរ​គឺ​​បាន​ជួយ​ជាតិមាតុភូមិ និងបានរួម​ចំណែក​យ៉ាងសកម្ម ក្នុងការធ្វើឲ្យប្រទេសកម្ពុជា មានសុខសន្តិភាពរហូតដល់សព្វថ្ងៃនេះ៕