កូដកម្មរបស់គ្រូបង្រៀន បានធ្វើឱ្យអ្នកដំណើរមានការភ្ញាក់ផ្អើល កាលពីថ្ងៃព្រហស្បតិ៍ ទី២០ មីនា ខណៈការបិទផ្លូវ បានធ្វើឲ្យរំខានដល់ការធ្វើដំណើរចូលទៅកាន់អាកាសយានដ្ឋានទីក្រុង Mexico City ដោយបង្ខំមនុស្សជាច្រើន ត្រូវដើរតាមដងផ្លូវដោយមានកាន់វ៉ាលីអីវ៉ាន់របស់ពួកគេដើម្បីបានទៅដល់អាកាសយានដ្ឋាន។

យោងតាមប្រព័ន្ធផ្សព្វផ្សាយក្នុងស្រុកបានឲ្យដឹងថា សមាជិកសហជីពគ្រូបង្រៀន CNTE បានផ្តួចផ្តើមគំនិតធ្វើកូដកម្មរយៈពេលពីរថ្ងៃជាប់ៗគ្នា ដោយទាមទារឱ្យរដ្ឋាភិបាលលុបចោលកំណែទម្រង់វិស័យអប់រំឆ្នាំ២០០៧ ដែលដាក់គ្រូបង្រៀននៅក្នុងប្រព័ន្ធសោធននិវត្តន៍ដែលមិនសូវមានការគាំ្រ និងបានដំឡើងអាយុចូលនិវត្តន៍ពី៥៨ឆ្នាំ ទៅ៦៥ឆ្នាំ។

ការតវ៉ានេះ បានបង្ខំឲ្យអ្នកធ្វើដំណើរទៅកាន់អាកាសយានដ្ឋានអន្តរជាតិទីក្រុង Mexico City ដើរទៅកាន់ស្ថានីយ ឬឡើងជិះលើរថយន្តនគរបាលដែលកំពុងជួយអ្នកទាំងឡាយណា ដែលត្រូវការជំនួយបន្ទាន់។

កូដកម្មត្រូវបានគេរំពឹងថានឹងបន្តរហូតដល់ថ្ងៃសុក្រ ទី២១ ខែមីនានេះ ទោះបីជាសមាជិកសហជីព បាននិយាយថា គ្រូបង្រៀននឹងបន្តខិតខំដើម្បីដាក់សម្ពាធលើរដ្ឋាភិបាល រហូតដល់ប្រធានាធិបតី លោកស្រី ក្លៅឌៀ សេនបោម(Claudia Sheinbaum) យល់ព្រមសន្ទនាជាមួយពួកគេ។