ភាពនឿយហត់ អន្ទះសារ និងតានតឹងចម្រុះគ្នា កំពុងរីករាលដាលពាសពេញកូរ៉េខាងត្បូង ខណៈការតវ៉ានៅតែបន្ត ជុំវិញសំណុំរឿងចោទប្រកាន់ទម្លាក់តំណែងលោកប្រធានាធិបតី Yoon Suk Yeol ក្នុងបរិយាកាសមិនពេញចិត្តកាន់តែខ្លាំងឡើង ដោយសារតែសាលក្រមចុងក្រោយបានបន្តអូសបន្លាយ។

គិតត្រឹមរសៀលថ្ងៃព្រហស្បតិ៍ (២០ មីនា) ម្សិលមិញនេះ តុលាការមិនទាន់ប្រកាសកាលបរិច្ឆេទសាលក្រមរបស់លោក Yoon នៅឡើយទេ រយៈពេលជាង ៣សប្តាហ៍មកហើយចាប់តាំងពីចៅក្រមទាំង ៨រូបរបស់តុលាការបានចាប់ផ្តើមកិច្ចពិភាក្សាជំនុំជម្រះបិទទ្វារលើសំណុំរឿងនេះ។

ផ្ទុយទៅវិញ តុលាការបានប្រាប់អ្នកសារព័ត៌មាននៅថ្ងៃព្រហស្បតិ៍ថា ខ្លួននឹងប្រកាសសាលក្រមចោទប្រកាន់ទម្លាក់តំណែងរបស់លោកនាយករដ្ឋមន្ត្រី Han Duck-soo នៅថ្ងៃចន្ទ ដើមសប្ដាហ៍ក្រោយ វេលាម៉ោង ១០ ព្រឹក។ គួរឱ្យដឹងថា លោក Han ត្រូវបានផ្អាកពីតំណែង នៅពេលរដ្ឋសភាបានអនុម័តលើសំណើនេះកាលពីថ្ងៃទី ២៧ ខែធ្នូ ឆ្នាំមុន។

ដោយសារការប្រកាសរបស់តុលាការមិនបាននិយាយពីសេចក្តីសម្រេចក្នុងសំណុំរឿងរបស់លោក Yoon និងដោយសារតែកាលបរិច្ឆេទនៃសាលក្រមជាធម្មតាត្រូវបានប្រកាសពីរថ្ងៃជាមុននោះ រឿងនេះបានបង្ហាញថា សេចក្តីសម្រេចសម្រាប់ក្ដីចោទប្រកាន់ទម្លាក់តំណែងលោកប្រធានាធិបតី Yoon ទំនងជាមិនធ្វើឡើងក្នុងសប្តាហ៍នេះទេ។ ប្រសិនបើតុលាការពិតជាប្រកាសសាលក្រមរបស់លោក Yoon នៅសប្តាហ៍ក្រោយមែន នោះនឹងកើតឡើងលើសពី ១០០ថ្ងៃ ចាប់តាំងពីញត្តិចោទប្រកាន់ទម្លាក់តំណែងត្រូវបានអនុម័តដោយរដ្ឋសភា កាលពីថ្ងៃទី១៤ ខែធ្នូ ឆ្នាំ២០២៤ មក៕