ភ្នំពេញ៖ ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងលោក ង្វៀន មីញវូ ឯកអគ្គរដ្ឋទូតវៀតណាមប្រចាំកម្ពុជា បានឯកភាពគ្នា បន្ដពង្រឹងកិច្ចសហប្រតិបត្តិការប្រយុទ្ធប្រឆាំងគ្រឿងញៀន និងបទឧក្រិដ្ឋឆ្លងដែនគ្រប់ប្រភេទ ។

ក្នុងជំនួបជាមួយទូតវៀតណាមប្រចាំកម្ពុជា កាលពីរសៀលថ្ងៃទី២០ ខែមីនា ឆ្នាំ២០២៥ ឯកឧត្តមឧបនាយករដ្ឋមន្ដ្រី មានប្រសាសន៍ថា រាជរដ្ឋាភិបាលកម្ពុជា បាននិងកំពុងខិតខំ​ដាក់ចេញ​យន្តការជាច្រើនក្នុងការទប់ស្កាត់ ​បង្ក្រាបបទល្មើសគ្រឿងញៀន ដូចជាការផ្សព្វផ្សាយអប់រំពី​បញ្ហា​គ្រឿងញៀន, យុទ្ធនាការសម្អាតចកចេញពីផ្ទៃបឹង, ការធ្វើតេស្តរកសារធាតុញៀនចំពោះមន្ត្រីរាជការ, យន្តការគ្រប់គ្រងសារធាតុញៀន និងគីមីផ្សំ ដើម្បីទប់ស្កាត់ការកែច្នៃផលិតគ្រឿងញៀន ។

ឯកឧត្តម បន្តថា ទោះជាយ៉ាងណាក៏ដោយ កម្ពុជានៅតែប្រឈមការលំបាកមួយចំនួន ជាពិសេស​គឺការងារព្យាបាល និងស្ដារនិតិសម្បទារបស់អ្នកញៀនគ្រឿងញៀន ខណៈបច្ចុប្បន្ន​នៅទូទាំង​ប្រទេសកម្ពុជា មានមជ្ឈមណ្ឌលស្ដារនីតិសម្បទា អ្នកញៀនគ្រឿងញៀនតែ២០ទីតាំងប៉ុណ្ណោះ ដែលបញ្ហានេះ សូមស្នើ ដល់ភាគីវៀតណាម ពិចារណាផ្ដល់ជំនួយទាំងបច្ចេកទេស និងសម្ភារៈ លើការងារបន្សាបគ្រឿងញៀន ដោយសារវៀតណាមមានបទពិសោធន៍ច្រើនលើការងារនេះ ។

ឯកឧត្តមសន្តិបណ្ឌិត នេត សាវឿន ក៏បានលើកឡើងពីកត្តាប្រឈម នឹងបញ្ហាគ្រឿងញៀន ដោយ​សារតែកម្ពុជា និងវៀតណាម ស្ថិតនៅក្បែរតំបន់ត្រីកោណមាស ដូច្នេះហើយប្រទេសទាំងពីរត្រូវ​មានវិធានការរួមគ្នាដើម្បីទប់ស្កាត់ ។

ជាការឆ្លើយតបឯកអគ្គរដ្ឋទូត ង្វៀន មីញវូ បានបង្ហាញការ​ស្ញប់ស្ញែង និងកោតសរសើរ​ចំពោះឧបនាយករដ្ឋមន្ដ្រី នេត សាវឿន ក្នុងតួនាទីដ៏សំខាន់ នៃរាជរដ្ឋាភិបាលនីតិកាលថ្មីនេះ ដែលបានជួយ​ជ្រោមជ្រែង លើការងារសន្ដិសុខសំខាន់ៗ តាំងពីនៅជាអគ្គស្នងការនគរបាលជាតិ ហើយបច្ចុប្បន្ននេះ ​បន្ដដើរតួនាទីយ៉ាងសំខាន់លើវិស័យសន្ដិសុខ ក៏ដូចជាទំនាក់ទំនង​ប្រទេសទាំងពីរផងដែរ ។

ជាមួយនេះ លោកទូត បានឯកភាពទាំងស្រុងចំពោះការលើកឡើងឯកឧត្តម ​នេត សាវឿន និង​យល់ឃើញថា បញ្ហាគ្រឿងញៀនជាបញ្ហាដែល​ស្មុគស្មាញ ហើយតម្រូវឲ្យភាគីទាំងពីរ ត្រូវតែ​បន្ដកិច្ចសហប្រតិបត្តិការល្អបន្ថែមទៀត ​ហើយនឹងជួយកម្ពុជា លើការងារប្រយុទ្ធប្រឆាំង​គ្រឿងញៀននេះ​ ជាពិសេសពាក់ព័ន្ធនឹងសំណើរបស់កម្ពុជា និងសហការជាមួយអាជ្ញាធរ​ជាតិ​ប្រយុទ្ធប្រឆាំងគ្រឿងញៀន ដើម្បីពិនិត្យលទ្ធភាពជួយលើការងារស្ដារនីតិសម្បទា ៕អត្ថបទ បាន សុខរិទ្ធិ