ប្រធានាធិបតីប្រទេសទួរគី លោក Tayyip Erdogan បាននិយាយកាលពីថ្ងៃព្រហស្បតិ៍ ថា គណបក្សប្រឆាំងធំ កំពុងស្វែងរកការបិទបាំងកំហុសរបស់ខ្លួន និងបោកបញ្ឆោតប្រជាជនដោយ «ឆាកល្ខោន» នៅក្នុងការអធិប្បាយដំបូងរបស់លោក ជុំវិញការឃុំខ្លួនអភិបាលក្រុងអ៊ីស្តង់ប៊ុល។ លោក Erdogan បាននិយាយនៅក្នុងសុន្ទរកថា នៅក្នុងទីក្រុង Ankara មួយថ្ងៃបន្ទាប់ពីអភិបាលក្រុង លោក Ekrem Imamoglu ដែលជាគូប្រជែងនយោបាយសំខាន់របស់លោកត្រូវបានឃុំខ្លួនថា «យើងមិនខ្ជះខ្ជាយពេលវេលា លើការជជែកដេញដោលគ្មានគោលដៅ ហើយក៏មិនខ្ជះខ្ជាយលុយកាក់ចោលដែរ»។

លោកបាននិយាយថា បញ្ហារបស់គណបក្សប្រជាសាធារណរដ្ឋ «មិនមែនជាបញ្ហារបស់ប្រទេសនោះទេ ប៉ុន្តែជាបញ្ហារបស់ជនឱកាសនិយមមួយក្តាប់នៅក្នុងទីស្នាក់ការរបស់ពួកគេ»។ «យើងគ្មានពេលវេលាខ្ជះខ្ជាយលើឆាកល្ខោនរបស់បក្សប្រឆាំងទេ»។ ជាមួយគ្នានេះ អ្នកគាំទ្រគណបក្សប្រឆាំងរាប់ពាន់នាក់ បានប្រមូលផ្តុំគ្នានៅខាងក្រៅអគារសាលាក្រុងអ៊ីស្តង់ប៊ុល កាលពីថ្ងៃព្រហស្បតិ៍ ដើម្បីតវ៉ាប្រឆាំងការឃុំខ្លួនអភិបាលក្រុងអ៊ីស្តង់ប៊ុល លោក Ekrem Imamoglu ។

ក្រុមអ្នកវ៉ា បានគ្រវីទង់ជាតិទួរគី និងបានស្រែកពាក្យស្លោកតវ៉ាចំពោះការសម្រេចចិត្តនេះ ខណៈ មេដឹកនាំគណបក្សប្រជាសាធារណៈរដ្ឋ ជាបក្សប្រឆាំង (CHP) បាននិយាយទៅកាន់ពួកគេពីលើរថយន្តក្រុង។ ប្រជាជនទួគី រាប់ពាន់នាក់បានបង្កើនការតវ៉ាជុំវិញទីក្រុងអ៊ីស្តង់ប៊ុល ទោះបីជាមានការហាមឃាត់លើការប្រមូលផ្តុំគ្នាតាមដងផ្លូវក្នុងទីក្រុង ជុំវិញអ្វីដែលពួកគេហៅថាការឃុំខ្លួនលោក IImamoglu ថាគ្មានលទ្ធិប្រជាធិបតេយ្យ ខណៈក្រុមប្រឆាំងបានព្យាយាមស្តីបន្ទោសទៅលើប្រធានាធិបតី លោក Tayyip Erdogan។