មន្ត្រីអាកាសយានដ្ឋានបាននិយាយនៅថ្ងៃសុក្រ (២១ មីនា) នេះថា យ៉ាងហោចណាស់ជើងហោះហើរអន្តរជាតិចំនួន ៧ជើងពីកោះរមណីយដ្ឋាន បាលី របស់ប្រទេសឥណ្ឌូនេស៊ី ត្រូវបានលុបចោល បន្ទាប់ពីភ្នំភ្លើងដ៏ធំមួយនៅភាគខាងកើតប្រទេសនៃប្រជុំកោះនោះ បានផ្ទុះឡើង ដោយព្រួសផ្សែងផេះយ៉ាងក្រាស់ឃ្មឹកកម្ពស់ដល់ទៅ ៨គីឡូម៉ែត្រឡើងលើមេឃ។

អាជ្ញាធរបាននិយាយថា ភ្នំភ្លើង Lewotobi Laki-Laki ដែលជាភ្នំភ្លើងភ្លោះកម្ពស់ ១.៧០៣ម៉ែត្រនៅលើកោះទេសចរណ៍ Flores បានផ្ទុះឡើងរយៈពេល ១១នាទី និង ៩វិនាទី កាលពីល្ងាចថ្ងៃព្រហស្បតិ៍ ដោយធ្វើឱ្យអាជ្ញាធរបង្កើនស្ថានភាពប្រកាសអាសន្នរបស់ភ្នំភ្លើងដល់កម្រិតខ្ពស់បំផុត។

អ្នកនាំពាក្យអាកាសយានដ្ឋានអន្តរជាតិរបស់កោះបាលី បាននិយាយនៅក្នុងសេចក្តីថ្លែងការណ៍មួយថា គិតត្រឹមព្រឹកថ្ងៃសុក្រនេះ "ជើងហោះហើរអន្តរជាតិចំនួនប្រាំពីរត្រូវលុបចោល ក្នុងនោះមានជើងហោះហើរ Jetstar ៦ជើងទៅអូស្ត្រាលី និងជើងហោះហើរ Air Asia មួយទៅកាន់ទីក្រុងគូឡាឡាំពួ"។ អ្នកនាំពាក្យបន្ថែមថា ជើងហោះហើរជាច្រើនផ្សេងទៀត ទាំងក្នុងស្រុក និងអន្តរជាតិ ត្រូវបានពន្យារពេល។

មិនមានរបាយការណ៍ពីការខូចខាតដល់ភូមិនៅក្បែរនោះទេ ប៉ុន្តែទីភ្នាក់ងារបានព្រមានអ្នកស្រុកពីលទ្ធភាពនៃលំហូរល្បប់ចេញពីភ្នំភ្លើងដោយសារតែភ្លៀងធ្លាក់ខ្លាំង។ គួររម្លឹកថា កាលពីខែវិច្ឆិកា ភ្នំភ្លើង Lewotobi Laki-Laki នេះបានផ្ទុះឡើងជាច្រើនដង ដោយបានសម្លាប់មនុស្ស ៩នាក់ បង្ខំមនុស្សរាប់ពាន់នាក់ឱ្យជម្លៀសចេញ និងបង្កការរំខានយ៉ាងទូលំទូលាយ៕