ក្រសួងការបរទេសរុស្ស៊ី បាននិយាយកាលពីថ្ងៃព្រហស្បតិ៍ (២០ មីនា) ថា អ៊ុយក្រែន បានរំលោភបំពានរួចទៅហើយទៅលើសំណើបទឈប់បាញ់ ដែលស្នើផ្អាកការវាយប្រហារលើទីតាំងថាមពលនៅក្នុងសង្គ្រាមរយៈពេល ៣ឆ្នាំ ដោយសារតែទីក្រុងគីវ បានបើកការវាយប្រហារដោយយានដ្រូនទៅលើឃ្លាំងប្រេងរបស់រុស្ស៊ី។

ទីភ្នាក់ងារសារព័ត៌មាន TASS របស់រុស្ស៊ី បានរាយការណ៍ថា អ្នកនាំពាក្យក្រសួងការបរទេស លោកស្រី Maria Zakharova បានប្រាប់ទូរទស្សន៍រដ្ឋថា នេះអាស្រ័យលើសហរដ្ឋអាមេរិក ដែលជាអ្នកស្នើបទឈប់បាញ់ ក្នុងការប្រឈមមុខនឹងអ៊ុយក្រែន ជុំវិញសកម្មភាពរបស់ខ្លួន។ 

វិមានក្រឹមឡាំងបាននិយាយនៅសប្តាហ៍នេះថា ប្រធានាធិបតីរុស្ស៊ី លោក Vladimir Putin បានយល់ព្រមជាមួយសមភាគីអាមេរិក លោក Donald Trump លើបទឈប់បាញ់ ៣០ថ្ងៃនៃការផ្អាកដាក់គោលដៅលើរោងចក្រថាមពល។

អាជ្ញាធរក្នុងតំបន់រុស្ស៊ី បាននិយាយនៅលើកម្មវិធីផ្ញើសារតេលេក្រាមថា ក្រុមពន្លត់អគ្គិភ័យនៅភាគខាងត្បូងរុស្ស៊ី Krasnodar នៅតែកំពុងទប់ទល់នឹងអគ្គិភ័យនៅឃ្លាំងស្តុកប្រេង ដែលបង្កឡើងដោយការវាយប្រហារយានដ្រូនរបស់អ៊ុយក្រែន។ លោកស្រី Zakharova បាននិយាយនៅលើកញ្ចក់ទូរទស្សន៍ថា "រុស្ស៊ីជឿថា របបគីវ បានបំផ្លាញសំណើបទឈប់បាញ់របស់ប្រធានាធិបតីអាមេរិករួចទៅហើយ ដោយសារតែការវាយប្រហារនេះ"៕