យន្តហោះចម្បាំងអ៊ីស្រាអែលកាលពីថ្ងៃព្រហស្បតិ៍ បានធ្វើការវាយប្រហារតាមអាកាសជាបន្តបន្ទាប់ ដោយកំណត់គោលដៅទៅលើតំបន់ជ្រៅៗមួយចំនួន នៅភាគខាងកើត និងភាគខាងត្បូងប្រទេសលីបង់។

ទីភ្នាក់ងារសារព័ត៌មានជាតិរបស់ប្រទេសលីបង់ បានរាយការណ៍ថា នៅភាគខាងកើតប្រទេសលីបង់ យន្តហោះចម្បាំងរបស់អ៊ីស្រាអែល បានវាយប្រហារតំបន់ជាយក្រុងនៃភូមិ Taraya ភាគខាងលិចនៃទីក្រុង Baalbek និងតំបន់ al-Shaara ក្បែរតំបន់ Janta នៅតាមជើងភ្នំនៃជួរភ្នំភាគខាងកើត។

របាយការណ៍ បានបន្ថែមថា នៅភាគខាងត្បូងប្រទេសលីបង់ អ៊ីស្រាអែល បានវាយប្រហារតាមអាកាទៅតំបន់ដែលស្ថិតនៅចន្លោះទីក្រុង Jbaa និងទីក្រុង Snaya ដោយមីស៊ីលចំនួន ៤គ្រាប់។

យោធាអ៊ីស្រាអែល បានបញ្ជាក់ពីការវាយប្រហារ ដោយនិយាយថា ពួកគេកំពុងកំណត់គោលដៅទៅលើហេដ្ឋារចនាសម្ព័ន្ធរបស់ក្រុមហេសបូឡា និងជើងទម្របាញ់គ្រាប់រ៉ូកែត។

យោធាបាននិយាយនៅក្នុងសេចក្តីថ្លែងការណ៍មួយថា៖«កងកម្លាំងការពារអ៊ីស្រាអែល (IDF) បានវាយប្រហារមូលដ្ឋានយោធាមួយ ដែលមានទីតាំងហេដ្ឋារចនាសម្ព័ន្ធក្រោមដីនៅក្នុងតំបន់ Beqaa (Valley) ក្នុងប្រទេសលីបង់»។ ទីតាំងមួយទៀតរបស់ក្រុមហេសបូឡា ដែលមានជើងទម្របាញ់រ៉ូកែតជាច្រើនគ្រឿង នៅភាគខាងត្បូងប្រទេសលីបង់ ក៏ត្រូវបានវាយប្រហារដែរ។

ការវាយប្រហារនេះ គឺជាការវាយប្រហារតាមអាកាសចុងក្រោយបង្អស់របស់អ៊ីស្រាអែល នៅក្នុងប្រទេសលីបង់ ក្នុងរយៈពេលប៉ុន្មានខែកន្លងមកនេះ ទោះបីជាមានបទឈប់បាញ់ដ៏ផុយស្រួយ ចាប់តាំងពីខែវិច្ឆិកា ឆ្នាំមុន និង    ខណៈដែលអ៊ីស្រាអែល បានបន្តការវាយប្រហារដ៏សាហាវ នៅតំបន់ហ្កាហ្សា ដោយធ្វើឲ្យបទឈប់បាញ់រយៈពេល ពីរខែ ជាមួយក្រុមហាម៉ាស បរាជ័យ។