បារាំង៖ នៅឯជំរំបណ្ដោះអាសន្នរវាងតំបន់ Dunkirk និងទីក្រុង Calais នៅតំបន់ឆ្នេរភាគខាងជើងរបស់ប្រទេសបារាំង ក្រុមជនអន្តោប្រវេសន៍កំពុងបោះជំរំតង់រង់ចាំឱកាសឆ្លងដែនទឹករបស់អង់គ្លេស ទោះបីជាមានសោកនាដកម្មសម្លាប់មនុស្សចំនួន ២៧នាក់កាលពីថ្ងៃពុធសប្ដាហ៍មុននៅពេលទូករបស់ពួកគេលិច ខណៈកំពុងធ្វើដំណើរនៅលើសមុទ្រ។
នគរបាលបានបង្កើនសកម្មភាពល្បាតនៅក្នុងរយៈពេលប៉ុន្មានថ្ងៃថ្មីៗនេះ និងអាកាសធាតុត្រជាក់ខ្លាំងដែលបង្កឧបសគ្គថែមទៀតដល់ការប៉ុនប៉ងឆ្លងសមុទ្រ។ ប៉ុន្តែជនអន្តោប្រវេសន៍ភាគច្រើននិយាយថា សោកនាដកម្មនេះនឹងមិនអាចរារាំងពួកគេមិនឲ្យឡើងទូកកៅស៊ូដែលអាចផ្ទុកមនុស្សបានត្រឹម ៥០នាក់ក្នុងក្ដីសង្ឃឹមទៅដល់ចក្រភពអង់គ្លេសបានឡើយ។ ថ្លែងប្រាប់សារព័ត៌មាន AP បុរសវ័យ ២២ឆ្នាំមកពីប្រទេសអ៊ីរ៉ង់លោក Kawa បាននិយាយថា រូបគេមិនខ្លាចអ្វីទាំងអស់សូម្បីតែទឹកសមុទ្រ ទោះរូបគេត្រូវស្លាប់ក៏ដោយ សូមទោសដែលនិយាយពាក្យនេះ ប៉ុន្តែពួកគេបានស្លាប់រួចទៅហើយ គ្មាននរណា ឬកន្លែងណាទទួលយកពួកយើងទេ។ ពួកយើងជាមនុស្សឥតប្រយោជន៍។
ប៉ុន្តែគ្រោះមហន្តរាយនៅសប្ដាហ៍នេះបានបង្ហាញពីលាយឡំគ្នានៃក្ដីស្រមៃ និងភាពអស់សង្ឃឹមដែលជំរុញឲ្យមនុស្សបោះជំរំក្រោមភ្លៀងរលឹម និងអាកាសធាតុចុះត្រជាក់ត្រឹមប្រហែល ៤អង្សាសេសម្រាប់ឱកាសប្រថុយជីវិតរបស់ពួកគេនៅលើសមុទ្រ។ ដើម្បីអាចមានកន្លែងអង្គុយនៅក្នុងទូក ពួកគេត្រូវបង់ប្រាក់ឲ្យក្រុមរត់ពន្ធមនុស្សក្នុងម្នាក់ចំនួន ២,៥០០ផោន ឬ ៣,៣៣៥ដុល្លារអាមេរិក។ យោងតាមទិន្នន័យចងក្រងដោយសភាចក្រភពអង់គ្លេស មនុស្សជាង ២៣,០០០នាក់បានចូលដល់ទឹកដីអង់គ្លេសរួចទៅហើយតាមរយៈទូកតូចៗនៅឆ្នាំនេះ ហើយកាលពីឆ្នាំមុនមានជាង ៨,៥០០នាក់ និងឆ្នាំ២០១៨ មានត្រឹម ៣០០នាក់ប៉ុណ្ណោះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
