រដ្ឋមន្ត្រីការបរទេសទួរគី លោក Hakan Fidan បាននិយាយកាលពីថ្ងៃព្រហស្បតិ៍ថា ប្រទេសទួរគី និងស៊ីរីមាន «ចេតនា និងទស្សនៈ» ដូចគ្នា ទាក់ទងនឹងស្ថានភាពនៃអង្គភាពការពារប្រជាជនឃើដស៊ីរី (YPG)។

ដោយបានចែករំលែកព័ត៌មានលម្អិតនៃដំណើរទស្សនកិច្ចរបស់លោក ទៅកាន់ទីក្រុងដាម៉ាស ( Damascus) នាពេលថ្មីៗនេះ លោក Fidan បានប្រាប់អ្នកសារព័ត៌មានថា ភាគីទាំងពីរ កំពុងស្ថិតនៅក្នុងស្ថានភាពដូចគ្នា ចំពោះ «បញ្ហានានាដូចជាចេតនា សមត្ថភាព និងការគ្រប់គ្រងធនធានថាមពលរបស់ក្រុមនេះ។

លោក Fidan បាននិយាយថា៖«នៅក្នុងទីក្រុងដាម៉ាស យើងបានដោះស្រាយពីរបៀប ដែលអង្គភាពការពារប្រជាជនឃើដស៊ីរី (YPG) នឹងធ្វើសកម្មភាព ក្រោមកិច្ចព្រមព្រៀង និងពេលវេលាកំណត់របស់ខ្លួន។ ការកម្ចាត់ចោលនូវសមត្ថភាពយោធារបស់អង្គភាពនេះ គឺជាអាទិភាពចម្បងសម្រាប់ពួកយើង»។

លោកបានចាត់ទុកករណីនេះថា «មិនអាចទទួលយកបាន» សម្រាប់អង្គភាពការពារប្រជាជនឃើដស៊ីរី (YPG) ដែលមាន«សមត្ថភាពសំខាន់ៗ ដូចជាអាវុធ ការផលិតមីស៊ីល និងប្រព័ន្ធការពារដែនអាកាស» ហើយបានបញ្ជាក់ពីវត្តមានរបស់យុទ្ធជនបរទេស នៅក្នុងអង្គភាព YPG គឺជាកង្វល់ធំមួយទៀត។

លោក Fidan បានសង្កត់ធ្ងន់ថា៖«សមាសភាពដែលមានស្រាប់ ត្រូវតែរំសាយ ទម្លាក់អាវុធ និងធ្វើសមាហរណកម្មទាំងស្រុង នៅក្រោមការគ្រប់គ្រងរបស់រដ្ឋាភិបាលកណ្តាល។ នេះ គឺជាការចាំបាច់។ រដ្ឋាភិបាលកណ្តាល ត្រូវតែមានសមត្ថភាព ក្នុងការបញ្ជា និងគ្រប់គ្រងយ៉ាងពេញលេញ»។