សារព័ត៌មាន Asharq al Awsat បានរាយការណ៍ថា អ្នកទោសស៊ីរីជាង ៧០០នាក់ ដែលកំពុងជាប់ឃុំ   នៅក្នុងពន្ធនាគារលីបង់ នឹងត្រូវប្រគល់ទៅឲ្យអាជ្ញាធរ ក្នុងទីក្រុងដាម៉ាស (Damascus) នាពេលខាងមុខនេះ។

យោងតាមរបាយការណ៍បានឲ្យដឹងថា នេះគឺជាក្រុមទី១ នៃជនជាតិស៊ីរី ២.000នាក់ ដែលត្រូវបានឃុំខ្លួននៅក្នុងពន្ធនាគារលីបង់ ដែលត្រូវបាននិរទេសទៅកាន់ប្រទេសកំណើតរបស់ពួកគេ ក្រោមកិច្ចព្រមព្រៀងទ្វេភាគី។ ពួកគេភាគច្រើន ត្រូវបានចាប់ខ្លួន នៅចន្លោះឆ្នាំ ២០១៣ និង ២០១៧ ពីបទពាក់ព័ន្ធជាមួយអង្គការភេរវកម្មឥស្លាម និងចូលរួមក្នុងការវាយប្រហារលើទាហានលីបង់។

កិច្ចព្រមព្រៀងប្រគល់អ្នកជាប់ឃុំទាំងនេះ ត្រូវបានសម្រេច កាលពីថ្ងៃទី ១១ ខែមករា ក្នុងដំណើរទស្សនកិច្ច ទៅក្រុងដាម៉ាសរបស់អតីតនាយករដ្ឋមន្ត្រីលីបង់ លោក Najib Mikati ដែលបានជួបជាមួយប្រធានាធិបតីបណ្តោះអាសន្នរបស់ស៊ីរីលោក Ahmed al-Sharaa។ បន្ទាប់ពីកិច្ចប្រជុំនោះ រដ្ឋាភិបាលអន្តរកាល បានប្រកាសថា៖«អ្នកទោសស៊ីរីទាំងអស់ នឹងត្រូវបញ្ជូនពីប្រទេសលីបង់ ទៅស្រុកកំណើតរបស់ពួកគេវិញ» ដោយពុំបានបញ្ជាក់ថាតើពួកគេ នឹងត្រូវដោះលែង ឬបន្តទោសរបស់ពួកគេ នៅស៊ីរី ឬយ៉ាងណានោះទេ។