ប្រធានាធិបតីទុយនីស៊ី លោក Kais Saied បានបណ្តេញលោកនាយករដ្ឋមន្ត្រី Kamel Maddouri ចេញពីតំណែង រយៈពេលតិចជាងមួយឆ្នាំ បន្ទាប់ពីតែងតាំងរបស់លោក ហើយបានតែងតាំងលោកស្រី Sara Zaafarani ជាអ្នកជំនួសតំណែងរបស់លោក ស្របពេលមានវិបត្តិសេដ្ឋកិច្ច និងហូរចូលកាន់តែអាក្រក់ឡើងនៃជនអន្តោប្រវេសន៍មកពីបណ្តាប្រទេសអនុតំបន់សាហារ៉ាអាហ្រ្វិក។

លោក Zaafarani ដែលជាវិស្វករ និងបានបម្រើការជារដ្ឋមន្ត្រីក្រសួងហេដ្ឋារចនាសម្ព័ន្ធ និងលំនៅឋាន ចាប់តាំងពីឆ្នាំ ២០២១ គឺជានាយករដ្ឋមន្ត្រីទី ៣ ក្នុងរយៈពេលមិនដល់ពីរឆ្នាំផងនោះ។

ក្នុងរយៈពេលប៉ុន្មានខែថ្មីៗនេះ លោក Saied បានរិះគន់យ៉ាងខ្លាំងដល់ការអនុវត្តរបស់រដ្ឋមន្ត្រីដោយនិយាយថា ពួកគេភាគច្រើន មិនបានបំពេញតាមស្តង់ដា ដែលត្រូវការនោះទេ ហើយថា ការរំពឹងទុករបស់ប្រជាជនទុយនីស៊ី មានកម្រិតខ្ពស់។ កាលពីខែមុន លោកបានបណ្តេញរដ្ឋមន្ត្រីក្រសួងហិរញ្ញវត្ថុ លោក Sihem Boughdiri ចេញពីតំណែង។

កំណើនសេដ្ឋកិច្ច មិនលើសពី ១,៤% ក្នុងឆ្នាំមុននោះទេ ហើយហិរញ្ញវត្ថុសាធារណៈរបស់ប្រទេសអាហ្រ្វិកខាងជើងនេះ ប្រឈមនឹងវិបត្តិធ្ងន់ធ្ងរ ដែលនាំឲ្យមានកង្វះខាតទំនិញសំខាន់ៗ រួមមានស្ករ អង្ករ និងកាហ្វេ។

លោក Saied បាននិយាយនៅក្នុងសន្ទរកថាមួយ នៅឯកិច្ចប្រជុំក្រុមប្រឹក្សាសន្តិសុខជាតិ កាលពីថ្ងៃសុក្រថា៖«យើងនឹងបន្តការប្រយុទ្ធរំដោះ រហូតដល់មានយុត្តិធម៌សម្រាប់ប្រជាពលរដ្ឋទាំងអស់...យើងនឹងបន្តរារាំងការសមគំនិតគ្នាទាំងអស់»។