ពិភពលោក៖ ប្រទេសចំនួនប្រមាណ ២០ បានដាក់វិធានការរឹតត្បិតលើអ្នកធ្វើដំណើរមកពីអាហ្វ្រិកខាងត្បូង និងប្រទេសជិតខាងរបស់ខ្លួនក្នុងពេលមានការព្រួយបារម្ភអំពីវីរុសបម្លែងខ្លួនថ្មី COVID-19 "Omicron"។ ប្រទេសកាណាដាបានប្រកាសពីការហាមឃាត់អ្នកដំណើរ ដែលបានទៅប្រទេសអាហ្វ្រិកចំនួន ៧ ក្នុងរយៈពេល ១៤ថ្ងៃ។
ប្រទេសរុស្ស៊ីនឹងហាមឃាត់អ្នកធ្វើដំណើរមកពីប្រទេសអាហ្វ្រិកខាងត្បូង រួមទាំងប្រទេស និងតំបន់មួយចំនួនទៀតចាប់តាំងពីថ្ងៃអាទិត្យម្សិលមិញ។ រដ្ឋាភិបាលសហព័ន្ធប្រទេសស្វីសបានប្រកាសហាមឃាត់មិនកំណត់ លើជើងហោះហើរត្រង់ទាំងអស់ពីប្រទេសចំនួន ៧ មកពីអាហ្វ្រិកខាងត្បូងដែលវិធានការរឹតត្បិតថ្មីបានចូលជាធរមានតាំងពីយប់ថ្ងៃសុក្រ។ ប្រទេសន័រវេស ទួរគី សិង្ហបុរី និងឥណ្ឌាក៏បានប្រកាសពីវិធានការហាមឃាត់ការធ្វើដំណើរ និងវិធានការទប់ស្កាត់វីរុសបម្លែងខ្លួនថ្មី Omicron ដូចគ្នានេះដែរ។ អនុប្រធានាធិបតីសហរដ្ឋអាមេរិកលោកស្រី Kamala Harris បាននិយាយថា រដ្ឋបាលសហរដ្ឋអាមេរិកនឹងចាត់វិធានការរាល់ការប្រុងប្រយ័ត្នជាមុន ដើម្បីប្រយុទ្ធប្រឆាំងទៅនឹងវីរុសបម្លែងខ្លួនថ្មី Omicron ដែលត្រូវបានកំណត់អត្តសញ្ញាណថ្មីនៃវីរុសកូរ៉ូណា។
ថ្លែងបន្ទាប់ពីការចុះទៅពិនិត្យទីផ្សារណូអែលក្នុងទីក្រុង Washington DC លោកស្រី Harris បានបញ្ជាក់លើតម្រូវការសម្រាប់ពលរដ្ឋក្នុងការចាក់វ៉ាក់សាំងបង្ការវីរុស COVID-19។ នៅពេលសួរថា តើវិធានការរឹតបន្តឹងលើការធ្វើដំណើរបន្ថែមទៀតអាចត្រូវបានអនុវត្ត ឬទេ លោកស្រីអនុប្រធានបាននិយាយថា រដ្ឋបាលកំពុងអនុវត្តវាមួយជំហានម្តងៗ។ វីរុសបម្លែងខ្លួនថ្មីកំពុងធ្វើឱ្យមន្ត្រីសុខាភិបាលសាធារណៈមានការព្រួយបារម្ភ ហើយបាននាំឱ្យមានការហាមឃាត់ការធ្វើដំណើរថ្មី ខណៈដែលអ្នកវិទ្យាសាស្ត្រកំពុងតាមដានដើម្បីស្វែងយល់ថា តើវាអាចមានគ្រោះថ្នាក់កម្រិតប៉ុណ្ណា៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
