អាជ្ញាធរក្នុងតំបន់ នៅថ្ងៃសុក្រ (ទី២១ ខែមីនា) នេះ បានប្រាប់ឲ្យដឹងថា ការផ្ទុះមួយបានធ្វើឲ្យកក្រើកឃ្លាំងស្តុកប្រេង ក្នុងតំបន់ Krasnodar របស់ប្រទេសរុស្ស៊ី ជាទីដែលក្រុមអ្នកពន្លត់អគ្គិភ័យកំពុងព្យាយាមពន្លត់អណ្ដាតភ្លើងដ៏សន្ធោសន្ធៅដែលបានឆាបឆេះឡើង បន្ទាប់ពីមានការវាយប្រហារដោយយានដ្រូនរបស់អ៊ុយក្រែន នៅដើមសប្តាហ៍នេះ។

មន្ត្រីបានឲ្យដឹងនៅលើកម្មវិធីផ្ញើសារ Telegram ថា៖ «ក្នុងអំឡុងពេលកំពុងពន្លត់អគ្គិភ័យនោះ ដោយសារតែសម្ពាធនៃសឺទែនដែលកំពុងឆេះធ្លកា់ចុះ ការផ្ទុះផលិតផលប្រេង និងការហូរប្រេងដែលកំពុងឆេះ ក៏កើតមានឡើង»។

ក្រុមមន្ត្រីបានបន្ថែមថា អគ្គិភ័យបានរាលដាលទៅដល់សឺទែនមួយផ្សេងទៀត ហើយតំបន់មានចំហេះ បានឡើងទំហំដល់ ១០.០០០ម៉ែត្រការ៉េ ពោលគឺច្រើនជាង ២ដងនៃតំបន់ឆាបឆេះដើមដំបូង។ អ្នកពន្លត់អគ្គិភ័យជាង ៤៥០នាក់ កំពុងប្រឹងប្រែងទប់ទល់នឹងអណ្ដាតភ្លើងនេះ ហើយបុគ្គលិក ២នាក់បានរងរបួស។

ទីភ្នាក់ងារសារព័ត៌មាន Interfax បានដកស្រង់សម្តីអាជ្ញាធរក្នុងតំបន់ ដែលនិយាយថា កម្រិតលើសនៃសារធាតុគីមីបង្កគ្រោះថ្នាក់ ក្នុងនោះរួមទាំងសារធាតុបង់ហ្សែនផងដែរ ត្រូវបានរកឃើញ អំឡុងការធ្វើតេស្តបរិយាកាសនៅទីតាំងចំនួន២ ក្បែរៗនោះ។ កន្លែងស្តុកនេះ ដែលនៅជិតភូមិ Kavkazskaya កំពុងស្ថិតនៅឯចំណតសា្ថនីយរថភ្លើង សម្រាប់ការផ្គត់ផ្គង់ប្រេងរបស់រុស្ស៊ីទៅកាន់បំពង់បង្ហូរប្រេងដែលភ្ជាប់កាហ្សាក់ស្ថាន ទៅកាន់សមុទ្រខ្មៅ។

បញ្ហាប្រឈមនៃការពន្លត់អគ្គិភ័យនេះ បានបង្ហាញពីផលប៉ះពាល់ដ៏រំខាននៃការវាយប្រហារជាញឹកញាប់របស់អ៊ុយក្រែនលើឧស្សាហកម្មថាមពលដ៏ធំរបស់រុស្ស៊ី ដែលប្រាក់ចំណូលរបស់វា បានជួយជំរុញដល់កិច្ចប្រឹងប្រែងសង្រ្គាមរបស់ទីក្រុងម៉ូស្គូ។ រុស្ស៊ីក៏បានវាយលុកបណ្តាញថាមពលរបស់អ៊ុយក្រែនពេញមួយសង្រ្គាមនេះផងដែរ ដោយបណ្តាលឲ្យមានការដាច់ចរន្តអគ្គិសនីជាញឹកញាប់ ដែលប៉ះពាល់ដល់ជនស៊ីវិល និងឧស្សាហកម្មនេះ៕