បេសកជនចិនប្រចាំនៅអង្គការសហប្រជាជាតិ (UN) កាលពីថ្ងៃព្រហស្បតិ៍ (ទី២០ ខែមីនា) បានជំរុញឲ្យអ៊ីស្រាអែលបញ្ឈប់ការវាយលុកផ្នែកយោធារបស់ខ្លួន លើតំបន់ហ្កាហ្សា និងបានអំពាវនាវឲ្យមានកិច្ចប្រឹងប្រែងអន្តរជាតិកាន់តែខ្លាំងឡើងៗឆ្ពោះទៅរកដំណោះស្រាយរដ្ឋ២ ដោយសង្កត់ធ្ងន់ពីតម្រូវការចាំបាច់ ដើម្បីឲ្យមានសន្តិសុខយូរអង្វែង ទាំងសម្រាប់ប៉ាឡេស្ទីន និងអ៊ីស្រាអែល។

ដោយនិយាយនៅក្នុងកិច្ចប្រជុំក្រុមប្រឹក្សាសន្តិសុខ ស្តីអំពីតំបន់ហ្កហ្សា នៅទីស្នាក់ការ UN លោក Sun Zhiqiang ទីប្រឹក្សានៃបេសកកម្មអចិន្ត្រៃយ៍របស់ចិន ប្រចាំនៅ UN បានសម្តែងការព្រួយបារម្ភយ៉ាងខ្លាំង ចំពោះការកើនឡើងនូវអំពើហិង្សា នៅក្នុងដែនដីប៉ាឡេស្ទីន និងការបំផ្លិចបំផ្លាញ ដោយសារជម្លោះរយៈពេល ១៥ខែ ដែលបានធ្វើឲ្យតំបន់ហ្កាហ្សា «ខុសទ្រង់ទ្រាយដើម» និងប្រជាជនជាច្រើនរងទុក្ខវេទនា។

លោក Sun បានលើកឡើងថា ប្រទេសចិនមានក្ដីសង្ឃឹមយ៉ាងពិតប្រាកដថា ការរងទុក្ខវេទនាទាំងអស់នោះ នឹងឈានដល់ទីបញ្ចប់ ហើយចំណាប់ថ្នូរ និងអ្នកដែលជាប់ឃុំឃាំងទាំងអស់ នឹងត្រូវបានដោះលែងភ្លាមៗ ស្របពេលដែលសន្តិភាពនឹងត្រូវបានស្ដារឡើងវិញ នៅតំបន់ហ្កាហ្សា។

លោកបានកត់សម្គាល់ថា ស្ថានការណ៍បានប្រែទៅជាអាក្រក់ឡើងៗ នៅពេលដែលអ៊ីស្រាអែល ចាប់ផ្ដើមបង្កអរិភាពឡើងវិញ នៅតំបន់ហ្កាហ្សា ក្នុងសប្តាហ៍នេះ ដែលនាំទៅដល់ការដួលរលំនៃកិច្ចព្រមព្រៀងបទឈប់បាញ់ ហើយបណ្តាលឲ្យមានការឈឺចាប់ និងការស្លាប់បន្ថែមទៀត។

លោកបានបន្ថែមថា ការពិតបានបង្ហាញថា ការសម្រេចបានបទឈប់បាញ់ជាអចិន្ត្រៃយ៍ គឺជាមធ្យោបាយដ៏ល្អបំផុត ក្នុងការជួយសង្គ្រោះជីវិត និងធ្វើឲ្យចំណាប់ថ្នូរបានវិលទៅកាន់ផ្ទះសម្បែងរបស់ពួកគេវិញ។ លោក Sun បានប្រាប់ក្រុមប្រឹក្សាសន្តិសុខថា៖ «យើងជំរុញឲ្យអ៊ីស្រាអែលបោះបង់គំនិត ក្នុងការប្រើប្រាស់កម្លាំង និងបញ្ឈប់ប្រតិបត្តិការយោធារបស់ខ្លួន លើតំបន់ហ្កាហ្សា»៕