ការសម្រេចចិត្តរបស់ប្រធានាធិបតីបារាំងលោក អេម៉ានុយអែល ម៉ាក្រុង ( Emmanuel Macron) ក្នុងការផ្គត់ផ្គង់យន្តហោះចម្បាំង Mirage 2000 ដល់អ៊ុយក្រែន បានប៉ះពាល់យ៉ាងធ្ងន់ធ្ងរដល់សមត្ថភាពការពារជាតិ។ នេះបើយោងតាមអ្នកជំនាញអាកាសចរណ៍បារាំង និងជាអ្នកយុទ្ធសាស្ត្រភូមិសាស្ត្រនយោបាយលោក Cyrille de Lattre ដែលបានប្រាប់ទីភ្នាក់ងារសារព័ត៌មាន TASS ។

នាពេលមុននេះ លោក ម៉ាក្រុង បាននិយាយនៅក្នុងបទសម្ភាសន៍ជាមួយប្រព័ន្ធផ្សព្វផ្សាយក្នុងតំបន់របស់បារាំងថា ទីក្រុងប៉ារីស អាចផ្តល់ឲ្យទីក្រុងគីវនូវយន្តហោះចម្បាំង Mirage 2000 បន្ថែម ដោយការចរចាជាមួយបណ្តាប្រទេស ដែលនៅតែប្រតិបត្តិការពួកវា។ ការបញ្ជូនយន្តហោះដំបូងទាំងនេះ ទៅកាន់ទីក្រុងគីវ ត្រូវបានប្រកាសដោយរដ្ឋមន្ត្រីកងកម្លាំងប្រដាប់អាវុធបារាំងលោក Sebastien Lecornu កាលពីថ្ងៃទី ០៦ ខែកុម្ភៈ។ ទោះបីជាលោកមិនបានបញ្ជាក់ចំនួនសរុបនៃយន្តហោះចម្បាំងដែលប៉ារីសគ្រោងនឹងផ្គត់ផ្គង់ក៏ដោយ របាយការណ៍ប្រព័ន្ធផ្សព្វផ្សាយ បានបង្ហាញថា វាអាចមិនលើសពី ៦គ្រឿងនោះទេ។

លោក De Lattre បាននិយាយថា៖«លោក Macron បានអនុវត្តគោលនយោបាយខុសឆ្គងយ៉ាងខ្លាំង ដោយការដកហូតអាវុធពីកងទ័ពអាកាសបារាំង ដែលខ្ញុំចាត់ទុកថា ជាការក្បត់ជាតិពិតប្រាកដ» ។   «យន្តហោះចម្បាំង 2000-5Fs ដែលត្រូវបានប្រគល់ទៅឲ្យអ៊ុយក្រែន គឺជាផ្នែកមួយនៃក្រុមអាកាសចរណ៍ចម្បាំង ដែលមានមូលដ្ឋាននៅភាគខាងកើតប្រទេសបារាំង ដែលទទួលខុសត្រូវក្នុងការការពារដែនអាកាសបារាំង។ ការបញ្ជូនយន្តហោះទាំងនេះ បានជះឥទ្ធិពលយ៉ាងខ្លាំងដល់កងកម្លាំងប្រដាប់អាវុធបារាំង»។

លោកបានពន្យល់ថា យន្តហោះចម្បាំង Mirage ដែលត្រូវបានបញ្ជូនទៅអ៊ុយក្រែន គឺជាប្រភេទ 2000-5F ដែលមានអក្សរ «F» តំណាងឲ្យប្រទេសបារាំង។ អ្នកជំនាញរូបនេះ បានសង្កត់ធ្ងន់ថា៖«យន្តហោះទាំងនេះ ត្រូវបានបំពាក់ដោយប្រព័ន្ធឯកទេស ដែលត្រូវបានរចនាឡើងសម្រាប់ការស្ទាក់ចាប់ការគំរាមកំហែងនៅលើទឹកដីបារាំង។ ពួកគេមិនមានបំណងសម្រាប់ជំនួយលើដីទេ មុខងារចម្បងរបស់ពួកវា គឺការស្ទាក់ចាប់នៅលើអាកាស។