ក្រុមមន្រ្តីអ៊ុយក្រែន និយាយថា រុស្ស៊ីបានវាយប្រហារទីក្រុងសមុទ្រខ្មៅ Odesa របស់អ៊ុយក្រែន ដោយប្រើប្រាស់យានដ្រូនក្នុងចំណោមយានដ្រូនច្រើនបំផុតរបស់ខ្លួន កាលពីយប់ថ្ងៃព្រហស្បតិ៍ បណ្តាលឲ្យយុវជន ៣នាក់រងរបួស ហើយនិងបង្កជាអគ្គិភ័យកើតឡើង ស្របពេលដែលប្រធានាធិបតីឆេក បំពេញដំណើរទស្សនកិច្ចទៅកាន់ទីនោះ ។

ការវាយប្រហារនេះ បានកើតមានឡើង ពេលដែលសហរដ្ឋអាមេរិកជំរុញឲ្យមានកិច្ចព្រមព្រៀងសន្តិភាពរវាងអ៊ុយក្រែន និងរុស្ស៊ី ហើយសង្ឃឹមថានឹងឈានដល់បទឈប់បាញ់ដោយផ្អែកដែលនឹងបញ្ឈប់ការវាយប្រហារលើហេដ្ឋារចនាសម្ព័ន្ធថាមពលដោយភាគីប្រទេសទាំង ២ ។

ប្រធានាធិបតីឆេកលោក Petr Pavel គឺជាអ្នកគាំទ្រទីក្រុងគីវដែលដឹកនាំកិច្ចខិតខំផ្តល់គ្រាប់កាំភ្លើងធំរាប់លានគ្រាប់ដល់អ៊ុយក្រែននោះ ស្ថិតក្នុងទីក្រុងកំពង់ផែមួយនេះ សម្រាប់កិច្ចប្រជុំជាមួយក្រុមមន្រ្តីក្នុងតំបន់ ពេលកើតមានការវាយប្រហារ ។

ក្រសួងមហាផ្ទៃអ៊ុយក្រែន និយាយថា យានដ្រូនរយៈចម្ងាយឆ្ងាយ បានហោះចូលទីក្រុង Odesa ដោយវាយប្រហារបណ្តាលឲ្យខូចខាតហេដ្ឋារចនាសម្ព័ន្ធ ផ្ទះសម្បែងរស់នៅរបស់ប្រជាពលរដ្ឋ និងអគារពាណិជ្ជកម្ម ហើយនិងបង្កឲ្យកើតមានអគ្គិភ័យជាច្រើនកន្លែងផងដែរ ។

លោក Oleksandr Kovalenko គឺជាអ្នកវិភាគយោធា និយាយប្រាប់ទីភ្នាក់ងារព័ត៌មានរ៉យទ័រថា រុស្ស៊ីប្រើប្រាស់តាក់ទិកថ្មីសម្រាប់ការវាយប្រហារនេះ ដោយប្រើយានដ្រូនទម្លាក់ខ្លួនចុះពីរយៈកម្ពស់ខ្ពស់ជាងពេលធម្មតា ក្នុងល្បឿនលឿន ដើម្បីធ្វើឲ្យពិបាកដល់ប្រព័ន្ធការពារដែនអាកាសរបស់អ៊ុយក្រែន ៕