លោក Eli Sharabi ដែលជាចំណាប់ថ្នូរត្រូវបានដោះលែង បានចែករំលែករឿងរ៉ាវឈឺចាប់របស់លោកនៅជំនួបក្រុមប្រឹក្សាសន្តិសុខអង្គការសហប្រជាជាតិ(UN)កាលពីថ្ងៃព្រហស្បតិ៍ ។

សក្ខីកម្មរបស់លោក Sharabi បានចាប់ផ្តើមជាមួយនឹងការរំឭកជីវិតផ្ទាល់ខ្លួនរបស់លោកជាមួយភរិយា Lianne កូនស្រី ២នាក់របស់ពួកគេ នាង Noiya និងនាង Yahel ហើយនិងសុនខ Mokka របស់ពួកគេ ។

លោកថា ភាពស្ងប់ស្ងាត់នេះ ត្រូវបានបំផ្លាញនៅថ្ងៃទី ៧ ខែតុលា ឆ្នាំ ២០២៣ ពេលដែលក្រុមភេរវកម្មហាម៉ាស់ ឈ្លានពានផ្ទះរបស់ពួកគេ ។

លោកនិយាយថា ឋានសួគ៌របស់លោកប្រែក្លាយជាឋាននរគ ពេលដែលលោកចំណាយពេលចាប់ពិរុទ្ធរយៈពេល ៤៩១ថ្ងៃនៅក្នុងផ្លូវរូងក្រោមដីរបស់ក្រុមហាម៉ាស់ ជាកន្លែងដែលលោកត្រូវបានគេដាក់ច្រវ៉ាក់ បង្អត់អាហារ និងវាយដុំរាងកាយ ។

លោក Sharabi និយាយថា នៅថ្ងៃចាប់ខ្លួនរបស់លោក ពួកយើងបានឮសំឡេងគ្រាប់កាំភ្លើង សំឡេងស្រែកហៅឲ្យជួយ សំឡេងផ្ទុះគ្រាប់ ហើយក្រោយមកពួកយើងឮសំឡេងភេរវករម្នាក់ស្រែកមកទ្វារផ្ទះរបស់ពួកយើង ។

លោកនិយាយផងដែរថា ជំនួយមនុស្សធម៌ដែលចែកចាយទៅកាន់តំបន់ហ្កាហ្សា ត្រូវបានប្រើប្រាស់ខុសដោយក្រុមហាម៉ាស់ ។ ក្រុមហាម៉ាស់ បានលួចវា លោកបានឃើញក្រុមហាម៉ាស់សែងប្រអប់បិទ Logoរបស់ UN និង UNRWA ចូលទៅក្នុងរូងក្រោមដី ប្រអប់ជំនួយទាំងនេះ ផ្តល់ជូនដោយរដ្ឋាភិបាលរបស់អ្នក តែចិញ្ចឹមក្រុមភេរវកម្មដែលធ្វើទារណកម្មលើរូបលោក ហើយធ្វើឃាតគ្រួសាររបស់លោក ។ ពួកគេហូបអាហាររបស់ UN នៅនឹងមុខរបស់ពួកយើង ហើយពួកយើងមិនដែលទទួលបានវាម្តងណានោះទេ ។ ពួកគេហូបដូចស្តេច ខណៈចំណាប់ថ្នូរអត់ឃ្លានចង់ដាច់ពោះស្លាប់ ៕