ក្រុមសាច់ញាតិមនុស្សបាត់ខ្លួន ត្រូវបានគេផ្តល់ការអនុញ្ញាតឲ្យចូលដល់កសិដ្ឋានរន្ធត់ ដែលជាទីតាំងកាប់សម្លាប់ចោទប្រកាន់របស់ក្រុមមេខ្លោងជួញដូរគ្រឿងញៀន និងជាជំរំបណ្តុះបណ្តាលស្ថិតក្នុងទីក្រុង Teuchitlan ដែលមានចម្ងាយប្រហែល ៦៤គ.ម នៅក្រៅទីក្រុង Guadalajara ដែលជារដ្ឋធានីរដ្ឋ Jalisco ស្ថិតនៅតំបន់ភាគខាងលិចប្រទេសម៉ិកស៊ិក។

នៅដើមខែនេះ ក្រុមសកម្មជនដែលស្វែងរកមនុស្សជាទីស្រលាញ់បាត់ខ្លួនរបស់ពួកគេ បានរកឃើញធាតុ បំណែកឆ្អឹងរាប់ពាន់ សម្លៀកបំពាក់ និងឡ.ក្រោមដីចោទប្រកាន់ដែលអាចប្រើប្រាស់ ដើម្បីបូជាសព ។

ដោយឡែក រដ្ឋអាជ្ញាជាន់ខ្ពស់មួយរូបរបស់ម៉ិកស៊ិក បាននិយាយថា មាននូវកំហុសក្នុងការស៊ើបអង្កេតលើកសិដ្ឋានចិញ្ចឹមសត្វ ស្ថិតក្នុងរដ្ឋ Jalisco ដែលក្រុមសកម្មជនហៅថាជា “ជំរំសម្លាប់ផ្តាច់ពូជ” គ្រប់គ្រងដោយក្រុមមេខ្លោងគ្រឿងញៀន ហើយលោកបានសន្យាថានឹងបើកកកាយការពិតនៅពីក្រោយអ្វីដែលបានកើតឡើងនៅទីនោះ ។

លោករដ្ឋអាជ្ញា Alejandro Gertz បាននិយាយនៅក្នុងសន្និសីទសារព័ត៌មានកាលពីថ្ងៃពុធថា ក្រុមអាជ្ញាធររដ្ឋ Jalisco ដឹងពីរឿងរ៉ាវរបស់កសិដ្ឋានចិញ្ចឹមសត្វនេះតាំងពីដើមខែកញ្ញាមកម្លោះ ប៉ុន្តែពួកគេពុំបានធ្វើតេស្តសាកសពមនុស្សនៅទីនោះ ឬកំណត់អត្តសញ្ញាណឲ្យបានត្រឹមត្រូវសម្លៀកបំពាក់ និងស្បែកជើងដែលត្រូវបានរកឃើញនៅទីនោះ ។

ក្រុមគ្រួសារមនុស្សបាត់ខ្លួន នាំគ្នាត្អែញត្អែរថា កសិដ្ឋានមួយនេះ ត្រូវបានសម្អាតដោយក្រុមអាជ្ញាធរមុនការមកដល់របស់ពួកគេ ហើយពួកគេពុំត្រូវបានអនុញ្ញាតឲ្យចូលទៅជិតអគារនៅក្នុងកសិដ្ឋានមួយនេះឡើយ ។

វាគឺជាលើកដំបូងហើយដែលសមាជិកគ្រួសារមនុស្សបាត់ខ្លួន ក៏ដូចជាក្រុមអ្នកសារព័ត៌មាន ត្រូវបានអនុញ្ញាតឲ្យចូលជាផ្លូវការទៅកាន់ទីនោះ អមដំណើរដោយក្រុមអាជ្ញាធរមកពីរដ្ឋ Jaliscoនិងការិយាល័យរដ្ឋអាជ្ញាសហព័ន្ធ ។

សូមបញ្ជាក់ថា ការរកឃើញកសិដ្ឋានរន្ធត់នេះ បង្កឲ្យមានការខឹងសម្បារយ៉ាងខ្លាំងនៅម៉ិកស៊ិក ជាទីដែលមនុស្សជាង ១២៤.០០០នាក់ កំពុងបាត់ខ្លួន ៕