ការិយាល័យប្រធានាធិបតីទុយនីស៊ីនិយាយនៅថ្ងៃសុក្រនេះថា លោកប្រធានាធិបតី Kais Saied បានបណ្តេញលោកនាយករដ្ឋមន្រ្តី Kamel Maddouri ចេញពីតំណែង និងបានតែងតាំងលោកស្រី Sarah Zaafarani Zenzari ជំនួសតំណែងវិញ ។

លោក Saied បានបណ្តេញរូបលោក Maddouri ចេញពីតំណែង រយៈពេលតិចជាង ១ឆ្នាំ ក្រោយការតែងតាំងរបស់លោក ស្របពេលសេដ្ឋកិច្ចធ្លាក់ចុះ ហើយនិងលំហូរជនអន្តោប្រវេសន៍ដ៏អាក្រក់បំផុតពីបណ្តាប្រទេសនៅអនុតំបន់សាហារ៉ាអាហ្វ្រិក ។

លោកស្រី Zaafarani ដែលជាវីស្វករ និងបម្រើការជារដ្ឋមន្រ្តីក្រសួងសម្ភារៈផ្គត់ផ្គង់ និងលំនៅឋាន ចាប់តាំងពីឆ្នាំ ២០២១មកនោះ គឺជានាយករដ្ឋមន្រ្តីទី ៣របស់ទុយនីស៊ី ក្នុងរយៈពេលតិចជាង ២ឆ្នាំ ។

នៅក្នុងរយៈពេលប៉ុន្មានខែចុងក្រោយនេះ លោក Saied បាននិយាយរិះគន់យ៉ាងខ្លាំងដល់ការអនុវត្តរបស់ក្រុមមន្រ្តីជាច្រើន ដោយលោកនិយាយថា ពួកគេជាច្រើនពុំបានឈានដល់ស្តង់ដារត្រូវការនោះទេ ហើយការរំពឹងទុករបស់ពលរដ្ឋទុយនីស៊ីមានខ្ពស់ ។ កាលពីខែមុន លោកបានបណ្តេញរដ្ឋមន្រ្តីក្រសួងហិរញ្ញវត្ថុលោក Sihem Boughdiri ចេញពីតំណែង ។

កំណើនសេដ្ឋកិច្ចទុយនីស៊ីមិនលើសពី ១,៤ភាគរយ ក្នុងរយៈពេល ១ឆ្នាំកន្លងមកនេះ ហើយហិរញ្ញវត្ថុសាធារណៈរបស់ប្រទេសនៅអាហ្វ្រិកខាងជើងមួយនេះ ប្រឈមនឹងវិបត្តិធ្ងន់ធ្ងរដែលនាំឲ្យខ្វះខាតទំនិញសំខាន់ៗ រួមទាំងស្ក ស្រូវ និងកាហ្វេ ។

ប្រទេសទុយនីស៊ី ប្រឈមផងដែរការរិះគន់ទ្រង់ទ្រាយធំចំពោះវិបត្តិជនអន្តោប្រវេសន៍ពុំធ្លាប់ដែលមានពីមុន ស្របពេលដែលជនអន្តោប្រវេសន៍មកពីអនុតំបន់សាហារ៉ាអាហ្វ្រិករាប់ម៉ឺននាក់ សម្រុកធ្វើដំណើរមកកាន់ប្រទេសទុយនីស៊ី ដើម្បីបន្តដំណើរទៅកាន់តំបន់ឆ្នេរប្រទេសអ៊ីតាលី ។

ជនអន្តោប្រវេសន៍រាប់ពាន់នាក់ នាំគ្នារស់នៅក្នុងសំពត់តង់ក្នុងព្រៃនៅទីក្រុង Amra និងទីក្រុង Jbeniana ក្រោយក្រុមអាជ្ញាធរ រារាំងពួកគេពីការធ្វើដំណើរតាមសមុទ្រទៅកាន់អឺរ៉ុប ៕