រដ្ឋមន្ត្រីការពារជាតិអ៊ីស្រាអែល លោក Israel Katz នៅថ្ងៃសុក្រ (ទី២១ ខែមីនា) នេះ បាននិយាយថា កងទ័ពកំពុងបង្កើនការវាយប្រហារទាំងផ្លូវអាកាស ផ្លូវគោក និងផ្លូវទឹក នៅតំបន់ហ្កាហ្សា ដើម្បីដាក់សម្ពាធក្រុមហាម៉ាសឲ្យដោះលែងចំណាប់ខ្មាំងដែលនៅសេសសល់ ហើយនឹងជម្លៀសជនស៊ីវិលទៅភាគខាងត្បូងនៃដែនដីនេះ។

បន្ទាប់ពីមានស្ថានការណ៍ស្ងប់ស្ងាត់អស់រយៈពេល ២ខែ អ្នកស្រុកហ្កាហ្សាបានភៀសខ្លួនជាថ្មីម្តងទៀត ដើម្បីការរស់រានមានជីវិត បន្ទាប់ពីអ៊ីស្រាអែលបានបញ្ចប់បទឈប់បាញ់ ដោយចាប់ផ្តើមយុទ្ធនាការទាំងផ្លូវអាកាស និងផ្លូវគោកថ្មី ប្រឆាំងនឹងក្រុមសកម្មហាម៉ាសប្រយុទ្ធប៉ាឡេស្ទីនដ៏មានឥទ្ធិពល។

លោក Katz បាននិយាយថា ក្រុមហាម៉ាសកាន់តែបន្តបដិសេធមិនដោះលែងចំណាប់ថ្នូរអ៊ីស្រាអែលដែលនៅសេស នោះដែនដីកាន់តែធំនឹងត្រូវបាត់បង់ឲ្យអ៊ីស្រាអែល។ លោកបានបន្ថែមថា យោធានឹងបង្កើនការវាយប្រហារទាំងពីផ្លូវអាកាស ផ្លូវទឹក និងផ្លូវគោក ហើយពង្រីកប្រតិបត្តិការផ្លូវគោក រហូតដល់ចំណាប់ថ្នូរត្រូវបានដោះលែង ហើយចុងក្រោយ ក្រុមហាម៉ាសត្រូវចុះចាញ់។

ដោយការពិភាក្សាបានបរាជ័យ ក្នុងការបង្រួមការយល់ឃើញខុសគ្នាឲ្យនៅតិចបំផុត ជុំវិញលក្ខខណ្ឌ ដើម្បីពង្រីកបន្ថែមបទឈប់បាញ់ យោធាអ៊ីស្រាអែលបានបន្តការវាយលុកលើតំបន់ហ្កាហ្សា ជាមួយនឹងយុទ្ធនាការទម្លាក់គ្រាប់បែកដ៏ធំ កាលថ្ងៃទី១៨ ខែមីនា មុនពេលបញ្ជូនទាហានចូលទៅតំបន់នេះ នៅថ្ងៃបន្ទាប់។

ថ្ងៃដំបូងនៃការចាប់ផ្ដើមវាយប្រហារតាមផ្លូវអាកាសឡើងវិញ កាលពីថ្ងៃទី១៨ ខែមីនា បានសម្លាប់ប្រជាជនប៉ាឡេស្ទីនជាង ៤០០នាក់ ដែលជាថ្ងៃមួយ ក្នុងចំណោមថ្ងៃមានអ្នកស្លាប់ច្រើនបំផុតនៃសង្រ្គាមមានរយៈពេល ១៧ខែ ដែលមានការផ្អាកប្រយុទ្ធតិចតួចប៉ុណ្ណោះ ចាប់តាំងពីបានផ្ទុះឡើង៕