ភ្នំភ្លើង Lewotobi Laki-laki របស់ប្រទេសឥណ្ឌូនេស៊ី បានផ្ទុះកាលពីថ្ងៃព្រហស្បតិ៍ម្សិលមិញ ហើយនិងបានព្រួសផ្សែង និងផេះទៅលើមេឃកម្ពស់ជាង ៨គ.ម ។ នេះបើយោងតាមការអះអាងរបស់របស់ក្រុមអាជ្ញាធរ បានឲ្យដឹងនៅថ្ងៃសុក្រនេះ ខណៈពួកគេបង្កើនស្ថានការអាសន្នដល់កម្រិតខ្ពស់បំផុត ។

ទីភ្នាក់ងារឧតុនិយមជាតិឥណ្ឌូនេស៊ី និយាយនៅក្នុងសេចក្តីថ្លែងការណ៍ថា ការផ្ទុះកាលពីយប់ថ្ងៃព្រហស្បតិ៍ នៅខេត្ត East Nusa Tenggara បានកើតមានឡើង បន្ទាប់ពីការផ្ទុះតូចៗរាប់សិបលើក ចាប់តាំងពីថ្ងៃទី ១៣ ខែមីនារហូតមក ។

ដងផ្លូវនៅភូមិ Lewolaga ត្រូវបានគ្របដណ្តប់ដោយផេះ ហើយភ្លៀងធ្លាក់នៅក្នុងសហគម៍ បានធ្វើឲ្យផេះទាំងនេះ ប្រែក្លាយជាគំនរភក់ ។

បុរសម្នាក់ ត្រូវបានបញ្ជូនទៅព្យាបាលនៅមន្ទីរពេទ្យ ក្រោយពេលរលាកភ្លើង ពេលដែលផេះភ្នំភ្លើងធ្លាក់លើដំបូងផ្ទះរបស់លោក ហើយលោកបានដួលលើរងើកអុស ។

គេនៅមិនទាន់ដឹងច្បាស់នោះទេ ថាតើមនុស្សប៉ុន្មានគ្រួសារ បានរងផលប៉ះពាល់ដោយសាររបន្ទុះភ្លើងកាលពីយប់ថ្ងៃព្រហស្បតិ៍នេះ ។ 

ក្រុមអាជ្ញាធរឥណ្ឌូនេស៊ី និយាយកាលពីខែវិច្ឆិកា ឆ្នាំមុនថា ពួកគេមានបំណងបំលាស់ទីអ្នកស្រុកអចិន្រ្តៃយ៍ឲ្យទៅរស់នៅកន្លែងផ្សេង ដោយលើកឡើងពីហានិភ័យនៃភ្នំភ្លើង ។

គួររំឭកថា មនុស្សយ៉ាងហោច ៩នាក់ ត្រូវបានសម្លាប់ និងមនុស្សរាប់ម៉ឺននាក់ផ្សេងទៀត ត្រូវបានជម្លៀសខ្លួន ពេលដែលភ្នំភ្លើង Lewotobi Laki-laki បានផ្ទុះឡើងកាលពីខែវិច្ឆិកា ឆ្នាំ ២០២៤ ៕