​អាហ្វ្រិក​ខាងត្បូង៖ ប្រធានាធិបតី​​អាហ្វ្រិក​ខាងត្បូង​លោក Cyril Ramaphosa បាន​និយាយ​ថា ប្រទេស​របស់​លោក​នឹង​ត្រូវ​បាន​រំពឹង​ថានឹង​ឈាន​ចូល​រលក​ទី៤ ​នៃ​ការ​ឆ្លង​វីរុស Covid-19 បន្ទាប់ពី​មានការ​រក​ឃើញ​វីរុស​ប​ម្លែ​ង​ខ្លួន​ថ្មី Omicron​។ លោក​បាន​និយាយ​ថា ចំនួន​ករណី​ឆ្លង​ជា​មធ្យម​ក្នុង​សប្ដាហ៍​កន្លង​ទៅ​នេះ​មាន​ចំនួន ១៦០០​ករណី​កើន​ឡើង​ពី ៥០០​ករណី​កាលពី​សប្ដាហ៍​មុន​នោះ​។

លោក Ramaphosa បាន​និយាយ​ថា អ្នកវិទ្យាសាស្ត្ររបស់​ប្រទេស​បាន​កំណត់​ថា ការ​កើន​ឡើង​ករណី​ឆ្លង​ភាគច្រើនគឺ​ដោយសារតែ​វីរុស​ប​ម្លែ​ង​ខ្លួន​ថ្មី Omicron​។ វីរុស​ប​ម្លែ​ង​ខ្លួន​ថ្មី Omicron ត្រូវ​បាន​កំណត់​អត្តសញ្ញាណ​កាលពី​ដើម​សប្ដាហ៍​មុន ដោយ​អ្នកស្រាវជ្រាវ​នៅ​ប្រទេស​អាហ្វ្រិក​ខាងត្បូង ហើយ​បាន​បណ្ដាល​ឱ្យ​មានការ​ប្រកាស​អាសន្ន​ជា​សកល​ថ្មី​មួយ​។ ប្រទេស​អាហ្វ្រិក​ខាងត្បូង​កាលពី​ថ្ងៃ​សៅរ៍បាន​អំពាវ​នាវ​ឱ្យ​មាន​កិច្ចសហការ​ និង​ការ​គាំទ្រ​អន្តរជាតិ​ក្នុង​ការ​ប្រយុទ្ធ​ប្រឆាំង​វីរុស COVID-19 ​ដោយ​ឆ្លើយតប​ទៅនឹង​វិធានការ​រឹតត្បិត​ជើង​ហោះ​ហើរ​ថ្មី និង​ការ​ធ្វើ​ដំណើរ​ពី​ប្រទេសអាហ្វ្រិក​ខាងត្បូង ដោយ​ប្រទេស​មួយ​ចំនួន​បន្ទាប់ពី​ការ​រក​ឃើញ​វីរុស​ប​ម្លែ​ង​ខ្លួន​ថ្មី Omicron​។

យោង​តាម​សេចក្ដីថ្លែងការណ៍​ដែល​បាន​ចេញ​ផ្សាយ​ នៅ​លើ​គេហទំព័រ​ផ្លូវការរបស់​ក្រសួង​ទំនាក់ទំនងអន្តរជាតិ និង​សហប្រតិបត្តិការប្រទេស​អាហ្វ្រិក​ខាងត្បូង​បាន​ឲ្យ​ដឹង​ថា ការ​ហាម​ឃាត់​ការ​ធ្វើ​ដំណើរហាក់​ដូច​ជា​ការ​ដាក់​ទណ្ឌកម្ម​មក​លើ​ប្រទេស​នេះ​។ សេចក្ដីថ្លែងការណ៍​បាន​និយាយ​ថា វិទ្យាសាស្ត្រ​ដ៏​អស្ចារ្យ​គួរតែ​ត្រូវ​បាន​សាទរ​ជំនួស​ឱ្យ​ការ​ដាក់​ទណ្ឌកម្ម ដោយ​ជំរុញ​ឱ្យ​មាន​ការ​ពង្រឹង​កិច្ច​សហប្រតិបត្តិការ​ក្នុងចំណោម​សហគមន៍​ពិភពលោក​។ វីរុស​ប​ម្លែ​ង​ខ្លួន​ថ្មី Omicron ត្រូវ​បាន​រក​ឃើញ​ដំបូង​នៅ​អាហ្វ្រិក​ខាង​ត្បូង​នៅ​ថ្ងៃ​ទី៩ ខែ​វិច្ឆិកា ហើយ​បាន​ចាត់ទុកថា​ជា​វីរុស​ប​ម្លែ​ង​ខ្លួន​ថ្មី​នៃ​ក្តី​បារម្ភ​ ដោយ​អង្គការ​សុខភាព​ពិភពលោក ​(WHO) កាលពី​ថ្ងៃ​សុ​ក្រ​សប្ដាហ៍​កន្លង​ទៅ​នេះ ហើយ​ការ​សិក្សា​អំពី​ការ​ឆ្លង​វីរុស និង​ភាព​ធ្ងន់ធ្ងរ​របស់​វា​កំពុង​ដំណើរ​ការ៕

អត្ថបទ៖ ប៊ុនថន