ក្រសួងថាមពលគុយបា និយាយថា គុយបាស្ថិតក្នុងដំណើរការពន្លឿនផែនការគាំទ្រដោយចិន ដើម្បីដំឡើងចម្ការផ្ទាំងស្រូបពន្លឺព្រះអាទិត្យជាង ៥០កន្លែងបន្ថែមទៀតក្នុងឆ្នាំនេះ ដែលមានសមត្ថភាពផ្តល់ថាមពលជាង ១ពាន់មេហ្គាវ៉ាត់ ។ ការលើកឡើងបែបនេះ បានកើតមានរយៈពេលប៉ុន្មានថ្ងៃប៉ុណ្ណោះ ក្រោយប្រព័ន្ធចរន្តអគ្គិសនីចាស់ហួសសម័យដួលរលំ បណ្តាលឲ្យមនុស្សរាប់លាននាក់ គ្មានថាមពលប្រើប្រាស់ ។

នៅក្នុងសេចក្តីរាយការណ៍លម្អិតបំផុតលើដំណើរការផែនការនេះ ក្រុមមន្រ្តីថាមពលនិយាយថា ចម្ការផ្ទាំងស្រូបពន្លឺព្រះអាទិត្យ ២កន្លែង បានផ្តល់សេវាកម្មកាលពីខែកុម្ភៈ ចម្ការមួយកន្លែងស្ថិតនៅក្នុងទីក្រុងឡាហាវ៉ាន់ និងចម្ការមួយកន្លែងទៀតស្ថិតក្នុងទីក្រុង Cienfuegos ហើយនៅដំណាច់ខែមីនានេះ កម្មករនឹងបញ្ចប់ចម្ការផ្ទាំងស្រូបពន្លឺព្រះអាទិត្យ ៦កន្លែងបន្ថែមទៀត ។

លោក Ovel Concepcion Diaz គឺជាមន្រ្តីថាមពលកកើតថ្មីនៅក្រសួងថាមពលគុយបា និយាយថា នៅដំណាច់ខែមីនានេះដែរ ចម្ការ ៨កន្លែងក្នុងចំណោមចម្ការផ្ទាំងស្រូបពន្លឺព្រះអាទិត្យគ្រោងទុក ៥០កន្លែង នឹងប្រតិបត្តិការ ដែលអាចផលិតថាមពលបាន ១៧០មេហ្គាវ៉ាត់ ។

ផែនការពង្រីកការផលិតថាមពលកកើតថ្មីដែលបានប្រកាសកាលពីឆ្នាំ ២០១៤នេះ ទទួលបានសន្ទុះយ៉ាងខ្លាំង ក្នុងរយៈពេលប៉ុន្មានខែចុងក្រោយ ស្របពេលដែលរដ្ឋាភិបាលចង់ស្តាឡើងវិញសេដ្ឋកិច្ចគ្មានសុខភាព ហើយនិងបន្ធូរបន្ថយភាពតានតឹងនៅក្នុងចំណោមប្រជាពលរដ្ឋគុយបា ដែលខកចិត្តនឹងការដាច់ចរន្តអគ្គិសនីច្រើនខែ ។

គោលដៅឆ្នាំ ២០៣០ នឹងផលិតអគ្គិសនីសរុប ២៤ភាគរយ ដោយប្រើប្រាស់ប្រភពកកើតថ្មី ពោលគឺកើនឡើងពីចំនួនបច្ចុប្បន្នប្រហែល ៤ភាគរយ ។ គោលដៅនេះ រួមទាំងការបង្កើតចម្បារផ្ទាំងស្រូបពន្លឺព្រះអាទិត្យ ៩២កន្លែង បន្ថែមពីលើស្ថានីយស្តុកអាគុយ គម្រោងបង្កើតថាមពលវារីអគ្គិសនី និងថាមពលខ្យល់៕