ទីភ្នាក់ងារកុមាររបស់អង្គការសហប្រជាជាតិ យូនីសេហ្វ (UNICEF) បានព្រមានកាលពីថ្ងៃសុក្រ (២១ មីនា) ថា ខ្លួននឹងអស់ការផ្គត់ផ្គង់អាហារសង្គ្រោះជីវិតពីឃ្លាំងស្តុក ដើម្បីព្យាបាលកុមារដែលរងគ្រោះពីកង្វះអាហារូបត្ថម្ភធ្ងន់ធ្ងរនៅក្នុងប្រទេសអេត្យូពី និងនីហ៊្សេរីយ៉ា ក្នុងរយៈពេលពីរខែខាងមុខនេះ ដោយសារតែកង្វះមូលនិធិមកពីការផ្ដាច់ជំនួយបរទេសរបស់រដ្ឋបាលលោកប្រធានាធិបតីអាមេរិក Donald Trump។

អង្គការយូនីសេហ្វ បាននិយាយថា កុមារអាយុក្រោម ៥ឆ្នាំប្រមាណ ១,៣លាននាក់ កំដែលពុងទទួលរងគ្រោះពីកង្វះអាហារូបត្ថម្ភកាន់តែធ្ងន់ធ្ងរ បានប្រឈមហានិភ័យនៃការបាត់បង់លទ្ធភាពទទួលបានជំនួយសង្គ្រោះជីវិតនៅឆ្នាំនេះ នៅក្នុងប្រទេសអេត្យូពី និងនីហ្សេរីយ៉ា។

ក្នុងប៉ុន្មានឆ្នាំថ្មីៗនេះ ម្ចាស់ជំនួយអន្តរជាតិបានកាត់បន្ថយការរួមចំណែកដល់ទីភ្នាក់ងារអង្គការសហប្រជាជាតិ រួមទាំងអង្គការយូនីសេហ្វ ផងដែរ។ វិបត្តិថវិការបស់អង្គការកុមារនេះបានកាន់តែអាក្រក់ នៅពេលអាមេរិក ដែលជាម្ចាស់ជំនួយធំបំផុតរបស់ខ្លួន បានផ្អាក ៩០ថ្ងៃលើជំនួយបរទេសទាំងអស់របស់អាមេរិក នៅថ្ងៃដំបូងនៃការវិលត្រឡប់របស់លោក Trump ទៅកាន់សេតវិមានក្នុងខែមករា។

សកម្មភាពនោះ និងការបន្តបញ្ជាឱ្យបញ្ឈប់កម្មវិធីជាច្រើនរបស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ USAID នៅទូទាំងពិភពលោក បានធ្វើឱ្យមានគ្រោះថ្នាក់ដល់ការផ្តល់អាហារសង្គ្រោះជីវិត និងជំនួយផ្នែកវេជ្ជសាស្រ្ដ ដោយធ្វើឱ្យមានភាពវឹកវរដល់កិច្ចខិតខំប្រឹងប្រែងសង្គ្រោះមនុស្សធម៌ទូទាំងពិភពលោក៕