កំពង់ឆ្នាំង៖ ដីព្រៃលិចទឹកតំបន់៣ទំហំ​ជិត ២ពាន់ហិកតា ស្ថិតក្នុង​ស្រុកកំពង់លែង ត្រូវបានក្រុមការងារចម្រុះរបស់រាជរដ្ឋាភិបាល​ដឹកនាំដោយឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងដែនដី នគររូបនីយកម្ម និងសំណង់ បានដកហូតមកទុកជាសម្បត្តិរដ្ឋវិញដោយគ្មានលក្ខខ័ណ្ឌ។

យុទ្ធនាការដក​ហូត​នេះ បានប្រព្រឹត្តិទៅនាព្រឹកថ្ងៃទី២៩ ខែវិច្ឆិកា ឆ្នាំ២០២១ ក្រោយពីសម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានចេញបទបញ្ជាយ៉ាងម៉ឺងម៉ាត់ឱ្យចាត់វិធានការណ៍ច្បាប់ចំពោះបុគ្គលដែលទន្ទ្រានដីរដ្ឋ។

ក្រោយពីពិនិត្យស្ថានភាពជាក់ស្តែងលើទីតាំងល្មើសរួចមក ឯកឧត្តម ជា សុផារ៉ា បាន​សម្រេច​ដកហូត​ដីព្រៃលិចទឹកតំបន់៣​ប្រមាណជិត២ពាន់ហិកតា ​ស្ថិតក្នុងភូមិគោកព្រះ ឃុំច្រណូក ពីបុគ្គល​ដែល​បានឈូសបំផ្លាញយកដីជាកម្មសិទ្ធិផ្ទាល់ខ្លួន មកទុកជាសម្បត្តិរដ្ឋវិញដោយឥតលក្ខខ័ណ្ឌ។

ឯកឧត្ដម ជា សុផារ៉ា បញ្ជាក់​ថា បើទោះបីដីទាំងនោះបាន និងកំពុងអាស្រ័យផលស្រូវក៏ដោយ រដ្ឋបាលខេត្ត និងមន្ទីរពាក់ព័ន្ធ ត្រូវចុះដាំកូនព្រៃឈើលិចទឹកឡើងវិញ ដោយក្នុង ១ហិកតាត្រូវដាំកូនឈើព្រៃលិចទឹកចំនួន១០០ដើម ក្នុងនោះមានដើមរាំង ដើមច្រកែង ដើមម្តេញ និងដើមសណ្តាន់ ហើយបន្តថែរក្សាឱ្យមាននិរន្តរភាពជាចាំបាច់។

ឯកឧត្ដម​ឧបនាយករដ្ឋ​មន្ត្រី ក៏​បាន​បញ្ជា​ឱ្យ​ចាប់ខ្លួនទាំងអស់រាល់បុគ្គលណាដែលមានចេតនារារាំង​ដំណើរការដកហូតដីព្រៃលិចទឹកនេះ ឬមានការតវ៉ាតាមរូបភាពណាក៏ដោយ។

ឯកឧត្ដម ជា សុផារ៉ា ក៏​បាន​ណែនាំ​ទៅ​ក្រសួងធនធានទឹក និងឧតុនិយម ត្រូវធ្វើផ្លាកកំណត់សម្គាល់ និងចង្អុលបង្ហាញប្រជាពលរដ្ឋពីទីតាំងដីព្រៃលិចទឹកតំបន់៣​ ដើម្បីកុំឱ្យមានការទន្ទ្រានបន្ត ជា​ពិសេស​ត្រូវអនុវត្ត និងចាត់វិធានការ​ទាំងអស់ខាងលើឱ្យទាន់ពេលក្នុងរយៈពេល​ ១សប្តាហ៍គិតចាប់​ពី​ថ្ងៃចុះយុទ្ធនាការតទៅ។

រដ្ឋបាលខេត្តកំពង់ឆ្នាំង នឹងបន្តស្រាវជ្រាវនៅកន្លែងរុករានព្រៃលិច​ទឹក​តំបន់២ ​និងតំបន់៣បន្តទៀត នៅ​ក្នុងស្រុកបរិបូណ៌ ​ស្រុកជលគីរី ​ក៏ដូចជាតំបន់ផ្សេងទៀត ដើម្បីដកហូតដីព្រៃលិចទឹកទាំងនោះ​មក​ទុក​ជាសម្បត្តិរដ្ឋវិញ និងបន្តការដាំដុះកូនព្រៃឈើលិចទឹកឡើងវិញ​ នៅតាមតំបន់​ដែល​រងការ​ឈូសបំផ្លាញ។

ចំណែកស្នងការនគរបាលខេត្តកំពង់ឆ្នាំងវិញ កំពុងបន្តនីតិវិធីកោះហៅបុគ្គលពាក់ព័ន្ធចំនួន ១៣នាក់​ជាម្ចាស់ដី មកសាកសួរព័ត៌មានជាបន្តបន្ទាប់។​

ក្នុងចំណោមបុគ្គលដែលរំលោភយកដីព្រៃលិចទឹកទាំង ១៣នាក់ខាងលើ​ គេសង្កេតឃើញ​មាន​ឪពុក​របស់ព្រះរាជអាជ្ញារងម្នាក់ ​នៅសាលាដំបូងខេត្តកំពង់ឆ្នាំង, ស្នងការរងនគរបាលខេត្តកំពង់ឆ្នាំង, អតីតមេបញ្ជាការប៉េអឹមស្រុកកំពង់លែង, មន្ត្រីសាលាស្រុកកំពង់លែង, និងអ្នកមានបុណ្យស័ក្តិមួយ​ចំនួន​នៅក្នុងខេត្តកំពង់ឆ្នាំងផងដែរ ៕ អត្ថបទ៖ ហុង វាស្នា