អាជ្ញាធរសុខាភិបាលដែលមានមូលដ្ឋាននៅហ្កាហ្សា បាននិយាយកាលពីថ្ងៃសៅរ៍ថា យ៉ាងហោចណាស់មានជនជាតិប៉ាឡេស្ទីន ១៣០នាក់ បានស្លាប់ និង ២៦៣ នាក់ផ្សេងទៀត បានរងរបួស នៅក្នុងការវាយប្រហាររបស់អ៊ីស្រាអែល លើតំបន់ហ្កាហ្សាស្ទ្រីប ក្នុងរយៈពេល ៤៨ម៉ោង កន្លងទៅនេះ។

អាជ្ញាធរសុខាភិបាល បានបន្ថែមថា ការវាយប្រហារនេះ បានធ្វើឲ្យចំនួនអ្នកស្លាប់កើនឡើងដល់ ៤៩.៧៤៧នាក់ និងអ្នករងរបួសឡើងដល់ ១១៣.២១៣ នាក់ ចាប់តាំងពីជម្លោះប៉ាឡេស្ទីន និងអ៊ីស្រាអែល បានផ្ទុះឡើងនៅដើមខែតុលា ឆ្នាំ ២០២៣។

សេចក្តីថ្លែងការណ៍ ក៏បានបញ្ជាក់ផងដែរថា ជនរងគ្រោះជាច្រើន នៅតែជាប់នៅក្រោមគំនរបាក់បែក ឬជាប់គាំងនៅតាមដងផ្លូវ ដែលរថយន្តសង្គ្រោះបន្ទាន់ និងក្រុមការពារស៊ីវិល មិនអាចចូលទៅដល់។ 

នៅក្នុងសេចក្តីថ្លែងការណ៍ដាច់ដោយឡែកមួយ អាជ្ញាធរសុខាភិបាលបានអំពាវនាវឲ្យប្រជាជន នៅតំបន់ហ្កាហ្សាស្ទ្រីប បរិច្ចាគឈាម ដោយធ្វើដំណើរទៅកាន់មន្ទីរពេទ្យប្រតិបត្តិការមួយចំនួន នៅក្នុងដែនដីនេះ ។

អ៊ីស្រាអែលបានបន្តការវាយប្រហារនៅតំបន់ហ្កាហ្សាកាលពីថ្ងៃអង្គារ បន្ទាប់ពីបទឈប់បាញ់ជាមួយក្រុមហាម៉ាស ដែលបានចាប់ផ្តើម នៅថ្ងៃទី ១៩ ខែមករា។ កងកម្លាំងអ៊ីស្រាអែល បានបើកប្រតិបត្តិការជាបន្តបន្ទាប់ នៅទូទាំងភាគខាងត្បូង ភាគខាងជើង និងភាគកណ្តាលតំបន់ហ្កាហ្សា។