ប្រព័ន្ធផ្សព្វផ្សាយរបស់ក្រុមសកម្មប្រយុទ្ធហ៊ួទី នៅប្រទេសយេម៉ែនកាលពីថ្ងៃសៅរ៍ថា បានចោទប្រកាន់សហរដ្ឋអាមេរិក បានវាយប្រហារអាកាសយានដ្ឋាន ក្នុងទីក្រុង Hodeida ដែលជាការអះអាងចុងក្រោយបំផុត ចាប់តាំងពីទីក្រុងវ៉ាស៊ីនតោន បានប្រកាសការវាយប្រហារយ៉ាងធ្ងន់ធ្ងរប្រឆាំងនឹងក្រុមឧទ្ទាមនេះ កាលពីមួយសប្តាហ៍មុន។

ទូរទស្សន៍ Al-Masirah ដែលស្តីបន្ទោស «ការឈ្លានពានរបស់អាមេរិក» បានលើកឡើងថា ការវាយប្រហារចំនួនបីលើក បានកំណត់គោលដៅលើអាកាសយានដ្ឋាន ក្នុងទីក្រុង Hodeida នៅលើឆ្នេរសមុទ្រក្រហម។

នៅចន្លោះថ្ងៃពុធ និងថ្ងៃសុក្រ ប៉ុស្តិ៍ទូរទស្សន៍របស់ក្រុមសកម្មប្រយុទ្ធគាំទ្រដោយអ៊ីរ៉ង់ បានធ្វើការចោទប្រកាន់ស្រដៀងគ្នានេះ បន្ទាប់ពីទីបញ្ជាការកណ្តាលរបស់សហរដ្ឋអាមេរិកកាលពីថ្ងៃពុធ បានបញ្ជាក់ពី «ប្រតិបត្តិការជាបន្តបន្ទាប់» ប្រឆាំងនឹងក្រុមសកម្មប្រយុទ្ធ ហើយលោកប្រធានាធិបតី ដូណាល់ ត្រាំ ( Donald Trump) បាននិយាយថា ពួកគេនឹងត្រូវ «កម្ទេចឲ្យអស់» ។

កាលពីថ្ងៃទី ១៥ ខែមីនា សហរដ្ឋអាមេរិក បានប្រកាសពីរលកនៃការវាយប្រហារតាមអាកាស ដែលមន្ត្រីបាននិយាយថា បានសម្លាប់មេដឹកនាំជាន់ខ្ពស់របស់ក្រុមហ៊ួទី ហើយដែលក្រសួងសុខាភិបាលរបស់ក្រុម សកម្មប្រយុទ្ធនេះ បាននិយាយថា មនុស្ស ៥៣នាក់ ត្រូវបានសម្លាប់។