រដ្ឋមន្ត្រីការពារជាតិអ៊ុយក្រែនលោក Rustem Umerov បានប្រកាសកាលពីថ្ងៃអាទិត្យថា កិច្ចពិភាក្សារវាងគណៈប្រតិភូអាមេរិក និងអ៊ុយក្រែន បានបញ្ចប់នៅក្នុងរដ្ឋធានី រីយ៉ាដ(Riyadh) របស់ប្រទេសអារ៉ាប៊ីសាអ៊ូឌីត ដោយនិយាយថាការពិភាក្សានេះគឺ ប្រកបដោយផ្លែផ្កា និងផ្តោតលើចំណុចសំខាន់ៗរួមទាំងថាមពល ។

គួរកត់សម្គាល់ថា ជំនួបនេះមានមុនកិច្ចពិភាក្សារវាងគណៈប្រតិភូអាមេរិក និងរុស្ស៊ី ដែលគ្រោងធ្វើនៅថ្ងៃចន្ទនេះ។ ប្រព័ន្ធផ្សព្វផ្សាយ បានរាយការណ៍កាលពីល្ងាចថ្ងៃអាទិត្យថាគណៈប្រតិភូរុស្ស៊ីបានទៅដល់ទីក្រុងរីយ៉ាដហើយ។ 

សហរដ្ឋអាមេរិក រៀបចំជំនួបដាច់ដោយឡែកជាមួយក្រុមគណៈប្រតិភូមកពីអ៊ុយក្រែន និងរុស្ស៊ី នៅអារ៉ាប៊ីសាអ៊ូឌីត ខណៈបេសកជនពិសេសអាមេរិក លោក Steve Witkoff បានសម្តែងសុទិដ្ឋិនិយមអំពីឱកាសនៃការបញ្ចប់ជម្លោះដ៏សាហាវបំផុតរបស់អឺរ៉ុប ចាប់តាំងពីសង្គ្រាមលោកលើកទីពីរ។ 

រដ្ឋមន្ត្រីការពារជាតិអ៊ុយក្រែនបាននិយាយថា គណៈប្រតិភូអ៊ុយក្រែន និងសហរដ្ឋអាមេរិក បានពិភាក្សាកាលពីថ្ងៃអាទិត្យ ២៣ មីនាពីសំណើដើម្បីការពារបរិក្ខារថាមពល និងហេដ្ឋារចនាសម្ព័ន្ធសំខាន់ៗ ដែលជាផ្នែកមួយនៃការជំរុញការទូតដោយប្រធានាធិបតីអាមេរិក លោក Donald Trump ដើម្បីបញ្ចប់សង្គ្រាមរយៈពេលបីឆ្នាំមកនេះ។    

លោក Witkoff បានប្រាប់ទូរទស្សន៍ Fox News កាលពីថ្ងៃអាទិត្យថាលោកមានអារម្មណ៍ថា លោកប្រធានាធិបតីរុស្ស៊ី Vladimir Putin ចង់បានសន្តិភាព ។

លោកគិតថាអ្នកនឹងមើលឃើញនៅប្រទេសអារ៉ាប៊ីសាអ៊ូឌីតក្នុងថ្ងៃចន្ទនេះ នូវវឌ្ឍនភាពពិតប្រាកដមួយចំនួន ជាពិសេសបទឈប់បាញ់នៅសមុទ្រខ្មៅលើនាវារវាងប្រទេសទាំងពីរ។ ហើយក្រោយមក អ្នកនឹងបានមើលឃើញបទឈប់បាញ់ពេញលេញ។