ក្រុមមន្ត្រីរដ្ឋបាលលោក Trump កាលពីថ្ងៃអាទិត្យ បានការពារការប្រើប្រាស់ច្បាប់អំណាចសម័យសង្រ្គាម ដើម្បីនិរទេសជនអន្តោប្រវេសន៍វេណេហ្ស៊ុយអេឡាជាច្រើននាក់ ទោះបីជាចៅក្រមរារាំងចំណាត់ការរនេះក៏ដោយ ហើយវេណេហ្ស៊ុយអេឡា បានបដិសេធការអះអាងរបស់ក្រុមមន្ត្រីអាមេរិក ដែលថាអ្នកនិរទេសទាំងនោះជាសមាជិកក្រុមជនអន្ធពាល ។

រដ្ឋអាជ្ញាលោក Pam Bondi បានប្រាប់អ្នកសម្របសម្រួលកម្មវិធី "Sunday Morning Futures" របស់ទូរទស្សន៍ Fox News គឺ លោកស្រី Maria Bartiromo ថា នោះជាសង្រ្គាមសម័យទំនើប ហើយយើងនឹងបន្តតតាំង និងការពារពលរដ្ឋអាមេរិកគ្រប់ជំហាន" ។ 

លោក Bondi បាននិយាយថាការសម្រេចចិត្តរបស់រដ្ឋបាលលោកTrump ក្នុងការនិរទេសជនអអន្តោប្រវេសន៍វេណេស៊ុយអេឡា១៣៧ នាក់កាលពីចុងសប្តាហ៍មុនទៅកាន់ប្រទេសអែលសាល់វ៉ាឌ័រ គឺមានភាពយុត្តិធម៌ដោយសារតែពួកគេជាសមាជិកនៃក្រុម ជនអន្ធពាល Tren de Aragua ដែលគួរឱ្យខ្លាចរបស់ប្រទេសវ៉េណេស៊ុយអេឡា និងបង្កហានិភ័យសុវត្ថិភាព។

រដ្ឋមន្ត្រីមហាផ្ទៃវេណេហ្ស៊ុយអេឡា លោក Diosdado Cabello បាននិយាយកាលពីថ្ងៃសុក្រថា គ្មានជនជាតិវេណេស៊ុយអេឡាណាម្នាក់ ដែលសហរដ្ឋអាមេរិក និរទេសទៅប្រទេសអែលសាល់វ៉ាឌ័រ ជាសមាជិកនៃក្រុមជនខិលខូច ដែលទីក្រុងវ៉ាស៊ីនតោន បានប្រកាសថាជាក្រុមភេរវករនោះទេ។ សាច់ញាតិ និងអ្នកតស៊ូមតិផ្នែកអន្តោប្រវេសន៍សម្រាប់បុរសមួយចំនួនក៏បានបដិសេធការជាប់ទាក់ទងណាមួយផងដែរ។

រដ្ឋបាលបានប្រើប្រាស់ច្បាប់ប្រឆាំងជនបរទេសឆ្នាំ១៧៩៨ ដែលជាច្បាប់ក្នុងសម័យសង្គ្រាម ដើម្បីនិរទេសជនអន្តោប្រវេសន៍ ផ្អែកលើហេតុផលថាពួកគេប្រព្រឹត្តបទឧក្រិដ្ឋហិង្សា ហើយបញ្ជូនប្រាក់ត្រឡប់ទៅប្រទេសវេណេហ្ស៊ុយអេឡាវិញ៕