ភ្នំពេញ៖ តបតាមការអញ្ជើញរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ឯកឧត្តមបណ្ឌិត ផន ខាំ វីផាវ៉ាន់ នាយករដ្ឋមន្ត្រីថ្មីនៃសាធារណរដ្ឋប្រជាធិបតេយ្យប្រជាមានិតឡាវ បានដឹកនាំគណៈប្រតិភូជាន់ខ្ពស់អញ្ជើញមកបំពេញទស្សនកិច្ចផ្លូវការរយៈពេល២ថ្ងៃនៅកម្ពុជា គឺថ្ងៃទី ២៩ និង ថ្ងៃទី៣០ ខែវិច្ឆិកា។
ក្នុងឱកាសអញ្ជើញមកបំពេញទស្សនកិច្ចផ្លូវការនេះ នៅល្ងាចថ្ងៃទី២៩ វិច្ឆិកា ឯកឧត្តមនាយករដ្ឋមន្ត្រីឡាវត្រូវបានសម្តេចតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញទទួលបដិសណ្ឋារកិច្ចយ៉ាងកក់ក្តៅរាក់ទាក់ និងស្និទ្ធស្នាលអមដោយកងកិត្តិយសត្រែទ័ពនៅវិមានសន្តិភាពទីស្តីការនាយករដ្ឋមន្ត្រី។វត្តមាននៃដំណើរអញ្ជើញមកទស្សនកិច្ចជាផ្លូវការនេះ ឯកឧត្តមបណ្ឌិត ផន ខាំ វីផាវ៉ាន់ និង សម្តេចតេ ជោ ក៏បានអញ្ជើញជួបពិភាក្សាទ្វេភាគីជុំវិញការងារជាអាទិភាព ដើម្បីបន្តពូនជ្រុំ នូវចំណងទាក់ទងមិត្ត ភាព សាមគ្គីភាព កិច្ចសហប្រតិបត្តិការលើគ្រប់វិស័យ ក្នុងនាមជាប្រទេសភូមិផងរបងជាមួយ។
ឯកឧត្តម អ៊ាង សុផល្លែត ជំនួយការផ្ទាល់សម្តេចតេជោបានប្រាប់ដល់ក្រុមអ្នកសារព័ត៌មាននៅក្រោយជំនួបថា៖ នៅក្នុងជំនួបនេះ ឯកឧត្តម ផន ខាំវីផាវ៉ាន់ បានសម្ដែងការអបអរសាទរ ជូនចំពោះសម្តេចតេ ជោដែលបានដឹកនាំព្រះរាជាណាចក្រកម្ពុជាឆ្ពោះមកកាន់ការអភិវឌ្ឍ។ ឯកឧត្តម បានមានប្រសាសន៍ថា៖ ដំណើរទស្សនកិច្ចមកកាន់ព្រះរាជាណាចក្រកម្ពុជានៅពេលនេះ ឯកឧត្តមបានសង្កេតឃើញមានការរីកចម្រើនយ៉ាងខ្លាំង ជាពិសេសរាជធានីភ្នំពេញគឺមានការប្លែកមុខប្លែកមាត់យ៉ាងច្រើន។
ឯកឧត្តមក៏បានសម្តែងការអបអរសាទរជូនចំពោះសម្តេចតេជោដែលបានទទួលជោគជ័យលើគ្រប់វិស័យរួមទាំងកិច្ចប្រជុំASEMថ្មីៗនេះ ព្រមទាំងការទទួលធ្វើជាប្រធានអាស៊ាននៅពេលខាងមុខ ហើយឯកឧត្តមក៏បានសម្ដែងការគាំទ្រនិងសន្យាថា នឹងសហការជាមួយនឹងកម្ពុជាដើម្បីធ្វើយ៉ាងណាជួយសម្ដេចតេជោដឹកនាំអាស៊ានឱ្យទទួលបានជោគជ័យ។ ឯកឧត្ដមនាយករដ្ឋមន្ត្រីឡាវក៏បានលើកឡើងអំពីអតីតកាលដែលកម្ពុជា និងឡាវ មានទំនាក់ទំនងជាបងប្អូនជាមិត្តភាព ជាវប្បធម៌ ជាប្រពៃណី រយៈពេលយូរលង់ណាស់មកហើយៗជាច្រើនពាន់ឆ្នាំមកនេះ កម្ពុជានិងឡាវពិតជាមានការប្រែប្រួលមែន ប៉ុន្តែទឹកចិត្តរវាងប្រជាជននិងប្រជាជនគឺនៅដដែល។ ឯកឧត្ដម វីផាវ៉ាន់ ក៏បានគោរពស្នើសុំសម្ដេចតេជោ ធ្វើយ៉ាងណាពង្រីកពង្រឹងកិច្ចសហប្រតិបត្តិការគ្នាតាមរយៈទី១.បន្តការផ្លាស់ប្តូរទស្សនកិច្ច រវាងគ្នាទៅវិញទៅ មកដើម្បីធ្វើយ៉ាងណាជំរុញធ្វើការបញ្ចប់ការងារដែលបានព្រមព្រៀងគ្នាកន្លងមក។ ទី២.បន្តពិភា ក្សាគ្នាចរចាគ្នាធ្វើយ៉ាងណាឲ្យបញ្ចប់កិច្ចព្រមព្រៀង កិច្ចសហប្រតិបត្តិការ ក្នុងភាពជាដៃគូគ្រប់ជ្រុងជ្រោយ។ ទី៣.ជំរុញបន្តកិច្ចប្រជុំតាមរយៈយន្តការដែលមានស្រាប់។ ទី៤.ជំរុញឲ្យគណៈកម្មការចម្រុះព្រំដែនធ្វើបន្តធ្វើការដើម្បីធ្វើយ៉ាងណាឲ្យបានសម្រេចតាមទិសដៅដែលថ្នាក់ដឹកនាំបានព្រមព្រៀងគ្នា។ ទី៥.ជំរុញកិច្ចសហប្រតិបត្តិការលើវិស័យពាណិជ្ជកម្មលើកស្ទួយពាណិជ្ជកម្មរវាងប្រទេសទាំងពីរ ។ ទី៦.ជំរុញកិច្ចសហប្រតិបត្តិការលើវិស័យអប់រំ វិស័យវប្បធម៌ ទេសចរណ៍និងវិស័យដទៃទៀតដែលជាសក្ដានុពលនៃប្រទេសទាំងពីរ។ ទី៧.ជំរុញវិស័យឯកជន, ទី៨.ជំរុញការវិនិយោគនិងគាំទ្រវិនិយោគិ នរវាងប្រទេសទាំងពីរ។
សម្តេចតេជោ ក៏បានថ្លែងអំណរគុណជូនចំពោះឯកឧត្ដម វីផាវ៉ាន់ ដែលបានគាំទ្រកម្ពុជាជាប្រធានអាស៊ាននឹងចូលរួមកិច្ចប្រជុំអាស៊ីអឺរ៉ុបជួយគាំទ្រកម្ពុជាជាប្រធានអាស៊ីអឺរ៉ុបកន្លងមកធ្វើឲ្យកម្ពុជាទទួលបានជោគជ័យក្នុងកិច្ចប្រជុំASEM និងបានគាំទ្រទាំងស្រុងលើចំណុចទាំង ៨ដែ លឯកឧត្តមវីផាវ៉ាន់បានលើកឡើង ហើយសម្ដេចក៏បានស្នើសុំឯកឧត្តម ផន ខាំវីផាវ៉ាន់ ពិចារណាធ្វើយ៉ាងណាឲ្យប្រជាជននៃប្រទេសទាំងពីរអាចធ្វើដំណើរទៅវិញទៅមក ព្រោះថាវិស័យទេសចរណ៍ ជាវិស័យដែលប្រទេសទាំង២បំពេញឱ្យគ្នាទៅវិញទៅមក។
ដោយឡែកចំពោះវិស័យវិនិយោគសម្តេចបានគាំទ្រធ្វើយ៉ាងណាឲ្យវិស័យនេះ ជំរុញឲ្យការវិនិយោគរវាងប្រទេសទាំងពីរ មានការគាំទ្រវិនិយោគិននៃប្រទេសទាំងពីរ ព្រោះថាការវិនិយោគនេះគឺជាមូលដ្ឋានសម្រាប់ពង្រឹងនិងពង្រីកកិច្ចសហប្រតិបត្តិការខាងនយោបាយ។
ជាទីបញ្ចប់សម្តេចបានជម្រាបជូន ឯកឧត្តមនាយករដ្ឋមន្ត្រីឡាវអំពីជំនួយរបស់កម្ពុជាដែលបានជួយដល់ប្រទេសឡាវមានទឹកប្រាក់ចំនួន១៣លានដុល្លារអាមេរិក ដែលក្នុងនោះ៣លានដុល្លារជាថវិការបស់រាជរដ្ឋាភិបាលកម្ពុជានិង១០លានដុល្លារទៀតជាថវិការបស់ក្រុមហ៊ុន ជូនរដ្ឋាភិបាលឡាវ ហើយក៏មានការផ្តល់ជំនួយដល់រដ្ឋាភិបាលឡាវនូវវ៉ាក់សាំងស៊ីណូវ៉ាក់ចំនួន៥០ម៉ឺនដូស និងរថយន្តដឹកវ៉ាក់សាំងចំនួន២គ្រៀងថែមទៀត។ឯកឧត្ដមវីផាវ៉ាន់ក៏បានចូលរួមសម្តែងមរណៈទុក្ខ ចំពោះការចូលទិវង្គតសម្ដេចក្រុមព្រះនរោត្តមរណឫទ្ធិផងដែរ ហើយសម្ដេចក៏បានអរគុណចំពោះឯកឧត្តមនាយករដ្ឋមន្ត្រីឡាវ ដែលបានចូលរួមសម្ដែងមរណទុក្ខចំពោះការចូលទិវង្គតរបស់សម្ដេចក្រុមព្រះនរោត្តម រណឫទ្ធផងដែរ៕ អត្ថបទ៖ មុត សុទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
