បេសកជនពិសេសអាមេរិកលោក Steve Witkoffនិយាយថាកិច្ចប្រឹបងប្រែងរបស់ប្រធានាធិបតីលោក Donald Trump ចំពោះមេដឹកនាំកំពូលរបស់អ៊ីរ៉ង់ លោក Ayatollah Ali Khamenei លើកិច្ចព្រមព្រៀងនុយក្លេអ៊ែរថ្មីដែលអាចកើតមាន គឺជាការប៉ុនប៉ងជៀសវាងសកម្មភាពយោធាដោយផ្ទាល់។

លោកWitkoff បានប្រាប់ទូរទស្សន៍ Fox News កាលពីថ្ងៃអាទិត្យថា យើងមិនចាំបាច់ដោះស្រាយអ្វីគ្រប់យ៉ាងដោយយោធាទេ ។សញ្ញារបស់យើងចំពោះអ៊ីរ៉ង់គឺ នាំគ្នាអង្គុយចុះ ហើយមើលថាតើយើងអាចធ្វើតាមរយៈកិច្ចសន្ទនា និងការទូត ទៅកាន់កន្លែងដែលត្រឹមត្រូវ ឬអត់។បើយើងអាចធ្វើបាន យើងត្រៀមខ្លួនធ្វើ។ ហើយបើយើងមិនអាច នោះពិតជាមិនមែនជម្រើសដ៏ល្អនោះទេ។

ការអត្ថាធិប្បាយរបស់លោក Witkoff កើតឡើងបន្ទាប់ពីលោក Trump បាននិយាយកាលពីថ្ងៃទី ៧ ខែមីនាថាលោកបានផ្ញើលិខិតមួយច្បាប់ទៅកាន់មេដឹកនាំអ៊ីរ៉ង់ ដែលស្វែងរកការចូលរួមក្នុងការពិភាក្សាអំពីសកម្មភាពនុយក្លេអ៊ែររបស់អ៊ីរ៉ង់ និងការព្រមានអំពីសកម្មភាពយោធាដែលអាចកើតមាន ប្រសិនបើត្រូវបានបដិសេធ។ វិធីសាស្រ្តនេះត្រូវបានរិះគន់ដោយលោក Khamenei ដែលបាននិយាយថាអ៊ីរ៉ង់ នឹងមិនចូលរួមក្រោមការគំរាមកំហែងនោះទេ។

លោក Trump ក៏បានគំរាមកំហែងទីក្រុង តេអេរ៉ង់ផងដែរ ជុំវិញការគាំទ្រណាមួយសម្រាប់ក្រុម ហ៊ួទី មានសម្ព័ន្ធភាពជាមួយអ៊ីរ៉ង់នៅប្រទេសយេម៉ែន ដែលបានបន្តការគាំទ្រផ្នែកយោធារបស់ពួកគេសម្រាប់ប៉ាឡេស្ទីន ដោយដាក់គោលដៅលើអ៊ីស្រាអែល បន្ទាប់ពីសម្ព័ន្ធមិត្តអាមេរិកមួយនេះ បានរារាំងជំនួយ និងកំពុងបន្តសង្គ្រាមរបស់ខ្លួននៅហ្កាហ្សា។ 

រដ្ឋមន្ត្រីការបរទេសអ៊ីរ៉ង់លោក Abbas Arghchi បាននិយាយកាលពីថ្ងៃអាទិត្យថា កិច្ចពិភាក្សាជាមួយសហរដ្ឋអាមេរិកគឺមិនអាចទៅរួចទេ លុះត្រាតែទីក្រុងវ៉ាស៊ីនតោនផ្លាស់ប្តូរគោលនយោបាយសម្ពាធរបស់ខ្លួន ។កាលពីថ្ងៃព្រហស្បតិ៍ លោកបាននិយាយថា លិខិតនោះគឺជាការគំរាមកំហែងច្រើនជាង ហើយក្រុងតេអេរ៉ង់ នឹងឆ្លើយតបវិញក្នុងពេលឆាប់ៗ៕