តុលាការធម្មនុញ្ញរបស់ប្រទេសកូរ៉េខាងត្បូង នៅថ្ងៃចន្ទ (ទី២៤ ខែមីនា) នេះ បានសម្រេចប្រគល់សិទ្ធិអំណាចដល់លោកនាយករដ្ឋមន្ត្រី Han Duck-soo វិញ ដែលជាការផ្លាស់ប្ដូរចុងចុងក្រោយបំផុតនៅក្នុងភាពចលាចលនយោបាយរបស់ប្រទេសនេះ បន្ទាប់ពីមានការចោទប្រកាន់ទម្លាក់តំណែងលើរូបលោក ជាប្រធានាធិបតីស្តីទី កាលពីជាង ២ខែមុន។

លោក Han បានចូលកាន់តំណែងជាមេដឹកនាំស្តីទី ជំនួសប្រធានាធិបតី លោក Yoon Suk Yeol ដែលខ្លួនលោកផ្ទាល់ ក៏ត្រូវបានចោទប្រកាន់ទម្លាក់តំណែង ពាក់ព័ន្ធទៅនឹងការប្រកាសច្បាប់អាជ្ញាសឹករយៈពេលខ្លី នៅឆ្នាំ២០២៤។ បន្ទាប់ពីមានការសម្រេចនេះ លោក Han បានវិលត្រលប់ទៅកាន់តំណែងជាប្រធានាធិបតីស្តីទីវិញភ្លាមៗ។

គួររំលឹកថា លោកនាយករដ្ឋមន្ត្រី Han បានចូលបំពេញតួនាទីតិចជាង ២សប្តាហ៍ ហើយត្រូវបានចោទប្រកាន់ និងព្យួរតំណែង កាលពីថ្ងៃទី២៧ ខែធ្នូឆ្នាំមុន បន្ទាប់ពីមានការប៉ះទង្គិចជាមួយសភាដឹកនាំដោយគណបក្សប្រឆាំង ជុំវិញការបដិសេធមិនតែងតាំងចៅក្រម ៣រូបបន្ថែមទៀត នៅតុលាការធម្មនុញ្ញ។

ចៅក្រម នៅតុលាការ បានសម្រេចជាមួយសំឡេង ៧ទល់នឹង១ ដើម្បីលុបចោលការចោទប្រកាន់នេះ។ បើយោងតាមសេចក្តីថ្លែងការណ៍របស់តុលាការ បានឲ្យដឹងថា ក្នុងចំណោមចៅក្រមទាំង ៨រូប ៥រូបបានលើកឡើងថា ញត្តិចោទប្រកាន់ទម្លាក់តំណែង ចំពោះលោក Han មានសុពលភាព ប៉ុន្តែមិនមានហេតុផលគ្រប់គ្រាន់ ដើម្បីចោទប្រកាន់រូបលោកទេ ដោយសារលោកមិនបានបំពានរដ្ឋធម្មនុញ្ញ ឬច្បាប់របស់កូរ៉េខាងត្បូង ទាក់ទងនឹងការប្រកាសច្បាប់អាជ្ញាសឹក ឬការបះបោរដែលអាចកើតមានឡើយ៕