ក្រុមអ្នកសង្កេតការណ៍ បានលើកឡើងថា កិច្ចប្រជុំចុងក្រោយរបស់រដ្ឋមន្ត្រីការបរទេសចិន ជប៉ុន និងកូរ៉េខាងត្បូង បានផ្តល់ឲ្យនូវវេទិកាទាន់ពេលវេលា និងសំខាន់ សម្រាប់ប្រទេសជិតខាងទាំង៣ ដើម្បីលើកកម្ពស់ការយល់ដឹងពីគ្នាទៅវិញទៅមក និងបន្តរក្សាសន្ទុះដ៏ល្អនៃកិច្ចសហប្រតិបត្តិការត្រីភាគី។

ក្នុងអំឡុងពេលមានភាពចលាចល និងអស្ថិរភាព កិច្ចសហប្រតិបត្តិការរបស់ប្រទេសទាំង៣ ត្រូវបានចាត់ទុកថា មានសារៈសំខាន់កាន់តែខ្លាំងឡើងបន្ថែមទៀត ដែលអ្នកសង្កេតការណ៍បានលើកឡើងថា នឹងមានអត្ថន័យ និងជះឥទ្ធិពលយ៉ាងខ្លាំងក្លា នៅទូទាំងពិភពលោក។

សូមបញ្ជាក់ថា កិច្ចប្រជុំរដ្ឋមន្ត្រីការបរទេសត្រីភាគីលើកទី១១ ចូលរួមដោយរដ្ឋមន្ត្រីការបរទេសចិន លោក Wang Yi រដ្ឋមន្ត្រីការបរទេសជប៉ុន លោក Takeshi Iwaya និងរដ្ឋមន្ត្រីការបរទេសកូរ៉េខាងត្បូង លោក Cho Tae-yul កាលពីថ្ងៃសៅរ៍ចុងសប្ដាហ៍កន្លងមក នៅទីក្រុងតូក្យូ ប្រទេសជប៉ុន គឺជាជំនួបកម្រិតខ្ពស់បំផុត គិតចាប់តាំងពីការមានការចាប់ផ្ដើមឡើងវិញនូវកិច្ចប្រជុំមេដឹកនាំត្រីភាគីបែបនេះ នៅទីក្រុងសេអ៊ូល ប្រទេសកូរ៉េខាងត្បូង កាលពីខែឧសភាឆ្នាំមុន។

លោក Xiang Haoyu អ្នកស្រាវជ្រាវនៅនាយកដ្ឋានសិក្សាអាស៊ីប៉ាស៊ីហ្វិកនៃវិទ្យាស្ថានសិក្សាអន្តរជាតិចិន បាននិយាយថា កិច្ចប្រជុំរបស់រដ្ឋមន្ត្រីការបរទេសនេះ មានគោលបំណងចាប់ផ្ដើមនូវផែនការ និងការសម្របសម្រួលជារួម សម្រាប់កិច្ចសហប្រតិបត្តិការត្រីភាគី នៅឆ្នាំនេះ និងដើម្បីបញ្ចូលកម្លាំងរុញច្រាន និងការណែនាំនយោបាយថ្មីទៅក្នុងកិច្ចសហប្រតិបត្តិការត្រីភាគី។

ចំណែកលោកស្រី Kumiko Haba អតីតអនុប្រធានសមាគមសិក្សាអន្តរជាតិ និងជាសាស្រ្តាចារ្យកិត្តិយសនៅសាកលវិទ្យាល័យ Josai International បាននិយាយថា ដើម្បីបន្តរក្សា និងលើកកម្ពស់សន្តិភាព និងស្ថិរភាពក្នុងតំបន់ ជាការចាំបាច់ណាស់ ក្នុងការដោះស្រាយជម្លោះ ដោយសន្តិវិធី តាមរយៈការមិនជ្រៀតជ្រែកកិច្ចការផ្ទៃក្នុងរបស់ប្រទេសដទៃ និងប្រកាន់យកនូវវិធីសាស្រ្តនៃការកំណត់នូវការយល់ឃើញខុសគ្នា។

លោក Woo Su-keun ប្រធានវិទ្យាស្ថានសិក្សាអាស៊ីបូព៌ានៃប្រទេសកូរ៉េ ក្នុងទីក្រុងសេអ៊ូល បានលើកឡើងថា វាមានសារៈសំខាន់ណាស់ សម្រាប់ប្រទេសទាំង៣ ក្នុងការរួមគ្នាបង្កើតឱកាសបន្ថែមទៀត សម្រាប់ការផ្លាស់ប្តូរប្រជាជន និងប្រជាជន ក្នុងវិស័យវប្បធម៌ សិល្បៈ យុវជន និងកិច្ចសហប្រតិបត្តិការសេដ្ឋកិច្ច ដើម្បីលើកកម្ពស់ការយល់ដឹងពីគ្នាទៅវិញទៅមក៕