រដ្ឋមន្ត្រីការបរទេសហ្ស៊កដានី លោក Ayman Safadi កាលពីថ្ងៃអាទិត្យ បានពិភាក្សាអំពីការកើនឡើងភាពតានតឹងដ៏គ្រោះថ្នាក់នៅក្នុងតំបន់ ជាមួយសមភាគីអ៊ីរ៉ង់លោក Seyed Abbas Araghchi។ នេះបើយោងតាមសេចក្តីថ្លែងការណ៍របស់ក្រសួងការបរទេសហ្ស៊កដានី។

ក្នុងអំឡុងពេលសន្ទនាតាមទូរស័ព្ទជាមួយ Araghchi លោក Safadi បានថ្កោលទោសការឈ្លានពានរបស់អ៊ីស្រាអែលលើតំបន់ហ្កាហ្សាស្ទ្រីប ដោយសង្កត់ធ្ងន់លើតម្រូវការសម្រាប់បទឈប់បាញ់ជាអចិន្ត្រៃយ៍ និងការប្រកាន់ខ្ជាប់របស់អ៊ីស្រាអែលចំពោះកិច្ចព្រមព្រៀងបទឈប់បាញ់បឋម ដែលសម្របសម្រួលដោយប្រទេសអេហ្ស៊ីប កាតា និងសហរដ្ឋអាមេរិក។

លោកក៏បានអំពាវនាវឲ្យសហគមន៍អន្តរជាតិប្រកាន់ជំហរច្បាស់លាស់ និងមានប្រសិទ្ធភាព ដើម្បីបង្ខំអ៊ីស្រាអែលឲ្យគោរពតាមកិច្ចព្រមព្រៀងឈប់បាញ់របស់ខ្លួនជាមួយលីបង់ និងបញ្ឈប់ការវាយប្រហាររបស់ខ្លួនលើប្រទេសស៊ីរី ដោយប្រកាន់ខ្ជាប់នូវកិច្ចព្រមព្រៀងបញ្ចប់សង្គ្រាមឆ្នាំ ១៩៧៤។

សេចក្តីថ្លែងការណ៍ បានបញ្ជាក់ថា លោក Safadi និង លោក Araghchi ក៏បានពិភាក្សាអំពីបញ្ហាទ្វេភាគីផងដែរ។

សម្រាប់ផ្នែករបស់ខ្លួន លោក Araghchi បានសម្តែងការព្រួយបារម្ភយ៉ាងខ្លាំងចំពោះការរំលោភលើកិច្ចព្រមព្រៀងបទឈប់បាញ់ម្តងហើយម្តងទៀតរបស់អ៊ីស្រាអែល នៅតំបន់ហ្កាហ្សា និងលីបង់ ដោយបានថ្កោលទោសយ៉ាងដាច់ខាតជុំវិញការវាយប្រហាររបស់អ៊ីស្រាអែល និងជនស៊ីវិលដែលបានបាត់បង់ជីវិត។

លោកបានជំរុញសហគមន៍អន្តរជាតិ និងប្រទេសឥស្លាមទាំងអស់ឲ្យចាត់វិធានការ ឲ្យបានឆាប់រហ័ស ដើម្បីបញ្ឈប់ការកើនឡើងភាពតានតឹង និងការពារការគំរាមកំហែងបន្ថែមទៀត ដល់ស្ថិរភាពក្នុងតំបន់។