អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅក្នុងបទសម្ភាសន៍ជាមួយអ្នកសារព័ត៌មាន VGTRK លោក Pavel Zarubinថា ជំនួសឲ្យការដោះស្រាយបញ្ហាឫសគល់នៃជម្លោះអ៊ុយក្រែន អឺរ៉ុបគ្រាន់តែធ្វើឲ្យពួកវាកាន់តែធ្ងន់ធ្ងរឡើង ដោយការបង្កើនការចំណាយយោធា និងពិចារណាលើការដាក់ពង្រាយកងទ័ពរបស់ខ្លួន នៅក្នុងប្រទេសអ៊ុយក្រែន ដោយហៅស្ថានភាពនេះថា ជារឿងមិនសមស្របទាល់តែសោះ។

អ្នកនាំពាក្យវិមានក្រឹមឡាំងរូបនេះ បានលើកឡើងថា៖«មួយវិញទៀត អឺរ៉ុបគួរតែចាប់អារម្មណ៍យ៉ាងពិតប្រាកដចំពោះសន្តិភាព។ ប៉ុន្តែឥឡូវនេះ ពួកគេកំពុងនិយាយអំពីសង្រ្គាម និងបន្តដំណើរការយោធារបស់  ខ្លួន ហើយនេះ គឺជារឿងចម្លែកមួយដែលថា ជំនួសឲ្យការស្វែងរកការលុបបំបាត់ឫសគល់នៃជម្លោះនេះ អឺរ៉ុបកាន់បង្កើនបញ្ហាថែមទៀត។ ហើយប្រសិនបើមិនបានស្រាយមូលហេតុទាំងនេះទេ ពុំអាចបញ្ឈប់សង្រ្គាមនេះបានទេ។ ផ្ទុយទៅវិញ អឺរ៉ុបកំពុងពិភាក្សាអំពីការដាក់ពង្រាយសក្តានុពលនៃកងកម្លាំងរបស់អង្គការណាតូ នៅក្នុងប្រទេសអ៊ុយក្រែន»។

លោក Peskov បានបង្ហាញពីការងឿងឆ្ងល់ថា ប្រជាជនអឺរ៉ុប កំពុងចោទសួរថា តើត្រូវរកលុយ ៨០០ ពាន់លានអឺរ៉ូ ពីកន្លែងណា មិនមែនសម្រាប់ការថែទាំសុខភាព ឬការអភិវឌ្ឍហេដ្ឋារចនាសម្ព័ន្ធទេ ប៉ុន្តែសម្រាប់ផ្នែកយោធា។ ផ្ទុយទៅវិញ លោកបានសង្កត់ធ្ងន់ថា បណ្តាប្រទេសអ៊ឺរ៉ុប គួរតែចាប់អារម្មណ៍ទៅលើ «ការរុះរើជញ្ជាំទាំងអស់»នៃឧបសគ្គជាមួយប្រទេសរុស្ស៊ី និងបន្តការអភិវឌ្ឍដែលផ្តល់ផលប្រយោជន៍ទៅវិញទៅមក ដោយសុខដុមរមនា ទើបជាការប្រសើរ។