ទីប្រឹក្សាសន្តិសុខជាតិអាមេរិក កាលពីថ្ងៃអាទិត្យ (ទី២៣ ខែមីនា) បាននិយាយថា ការវាយប្រហារដោយក្រុមឧទ្ទាមហ៊ួទី ក្នុងប្រទេសយេម៉ែន បានបង្ខំឲ្យនាវា ៣ភាគ៤ ដែលមានទង់ជាតិអាមេរិក គេចចេញពីផ្លូវសមុទ្រក្រហម ហើយជំនួសវិញទៅធ្វើដំណើរនៅលើផ្លូវដ៏ចម្ងាយឆ្ងាយ និងមានតម្លៃថ្លៃជាង នៅជុំវិញចុងភាគខាងត្បូងនៃទ្វីបអាហ្រ្វិក។

លោក Mike Waltz បានប្រាប់កម្មវិធី Face the Nation របស់ប្រព័ន្ធផ្សព្វផ្សាយ CBS ថា៖ «៧៥ភាគរយនៃនាវាដឹកជញ្ជូនដែលមានទង់ជាតិសហរដ្ឋអាមេរិករបស់យើង ឥឡូវនេះត្រូវធ្វើដំណើរជុំវិញឆ្នេរសមុទ្រភាគខាងត្បូងនៃទ្វីបអាហ្រ្វិក ជំនួសឲ្យការឆ្លងកាត់ព្រែកជីក Suez»។ លោកបានបន្ថែមថា៖ «សម្រាប់លើកចុងក្រោយនេះ នាវាពិឃាតមួយគ្រឿងរបស់យើង ដែលបានឆ្លងកាត់ច្រកសមុទ្រនោះ ត្រូវបានវាយប្រហារ ២៣ដង»។

លោក Waltz បាននិយាយថា ការវាយប្រហារតាមអាកាសនាពេលថ្មីៗនេះរបស់សហរដ្ឋអាមេរិក ប្រឆាំងនឹងក្រុមឧទ្ទាមគាំទ្រដោយអ៊ីរ៉ង់ ដែលជាលើកទី១ គិតចាប់តាំងពីលោកប្រធានាធិបតី Donald Trump ចូលកាន់តំណែងក្នុងខែមករា បាន «សម្លាប់មេដឹកនាំសំខាន់ៗរបស់ក្រុមហ៊ួទី» ក្នុងនោះរួមទាំងប្រមុខកម្មវិធីមីស៊ីលរបស់ក្រុមនេះផងដែរ។

សូមបញ្ជាក់ថា ក្រុមហ៊ួទី ប្រាប់ថា ពួកគេបានកំណត់គោលដៅលើនាវានានា ដែលចរាចរនៅសមុទ្រក្រហម ដោយការធ្វើបែបនេះ គឺដើម្បីបង្ហាញសាមគ្គីភាពជាមួយប៉ាឡេស្ទីន ចាប់តាំងពីដើមដំបូងនៃសង្រ្គាមរបស់អ៊ីស្រាអែល នៅតំបន់ហ្កាហ្សា។ ហើយជាមួយគ្នានេះ ក្រុមឧទ្ទាមមួយនេះ បានបន្ថែមថា ការវាយប្រហារដោយការទម្លាក់គ្រាប់បែករបស់អាមេរិក កាលពីពេលថ្មីៗនេះ លើយេម៉ែន បានឆក់យកជីវិតមនុស្សជាង ៥០នាក់។

នៅពេលដែលត្រូវបានសួរកាលពីថ្ងៃអាទិត្យ (ទី២៣ ខែមីនា) អំពីរបាយការណ៍នៃការវាយប្រហារថ្មីៗ នៅក្នុងប្រទេសយេម៉ែន មន្ត្រីការពារជាតិអាមេរិកម្នាក់ បានប្រាប់សារព័ត៌មាន AFP ថា កងកម្លាំងអាមេរិកកំពុងធ្វើការវាយប្រហារនៅទូទាំងទីតាំងជាច្រើនរបស់ក្រុមហ៊ួទីដែលគាំទ្រដោយអ៊ីរ៉ង់ជារៀងរាល់យប់ និងថ្ងៃ ក្នុងប្រទេសយេម៉ែន៕