​បាល់ទាត់៖ ​ក្លិប​បិសាច​ក្រហម Manchester United បាន​ប្រកាស​តែងតាំង​អ្នកចាត់ការ​ថ្មី​លោក Ralf Rangnick ផ្លូវការ​ដឹកនាំ​ក្រុម​ដល់​ចប់​រដូវ​កាល​នេះ​។ បុរស​វ័យ ៦៣ឆ្នាំ​រូបនេះ​បានមក​កាន់តំណែង​បន្ត​ពី​លោក Ole Gunnar Solskjaer ដែល​ត្រូវបាន​បណ្តេញចេញ​កាលពី​ថ្ងៃទី២១ ខែវិច្ឆិកា​នេះ​ក្រោយ​ចាញ់ Watford ៤-១​។

​​លោក Rangnick បាន​ចាក​ចេញពី​តំណែង​ប្រធាន​ផ្នែក​អភិវឌ្ឍ​កីឡា​នៃ​ក្លិប​រុស្ស៊ី Lokomotiv Moscow ដើម្បី​មកកាន់​តំណែង​នៅ Old Trafford នេះ​ដល់​ចប់​រដូវ​កាល​ហើយ ក៏​នឹង​បន្ត​នៅ​ជាមួយ​ក្លិប ២ឆ្នាំ​ទៀត​ក្នុងតួនាទី​ក្រុមប្រឹក្សា​យោបល់​។ ​ប្រកួត​ដំបូង​របស់​អ្នកចាត់ការ​សញ្ជាតិ​អាល្លឺម៉ង់​រូបនេះ​ជាមួយ Manchester United នឹង​អាច​ទាន់ពេល​ជួប​ក្រុម​កាំភ្លើង​ធំ Arsenal ប្រសិនបើ​ការងារ​រៀបចំ​ទិ​ដ្ឋ​ការ​រួច​រា​ល់​ទាន់ពេលវេលា​។​ ​ប្រសិនបើ​មិនទាន់​ពេល​ទេ​លោក Michael Carrick នឹង​បន្ត​ដឹកនាំ​ក្រុម​មួយ​ប្រកួត​ទៀត​។ ​Michael Carrick បាន​ដឹកនាំក្រុម​ពីរ​ប្រកួត​មកហើយ​ដោយបាន​យកឈ្នះ​នៅ​ទឹកដី Villarreal និង​ស្មើ​នៅ​ទឹកដី Chelsea ១-១ កាលពី​ថ្ងៃអាទិត្យ​។

​​រំលឹកថា​ លោក Ralf Rangnick ធ្លាប់​ដឹកនាំ​ក្លិប​អាល្លឺម៉ង់ Schalke 04 ឈ្នះ​ជើងឯក German Cup នៅ​ឆ្នាំ២០១១ និង​ធ្លាប់​ដឹកនាំ RB Leipzig ផងដែរ​។ ​ជាពិសេស​ទៅទៀត​នៅ​ឆ្នាំ២០១១ នោះ​អ្នកចាត់ការ​សញ្ជាតិ​អាល្លឺម៉ង់​រូបនេះ​បាន​ដឹកនាំ Schalke ឡើងដល់​វគ្គ​ពាក់កណ្តាល​ផ្តាច់ព្រ័ត្រ UEFA Champions League តែ​ចាញ់ Manchester United សរុប​ទាំងពីរ​ជើង ៦-១ មុនពេល​ដែល Manchester United ឡើងទៅ​ចាញ់ Barcelona នៅ​វគ្គ​ផ្តាច់ព្រ័ត្រ​។​ ​លោក Ralf Rangnick ធ្លាប់មាន​ប្រវត្តិ​ដឹកនាំ​ក្លិប​ជាច្រើន តែ​សុទ្ធតែជា​ក្លិប​អាល្លឺម៉ង់​មាន​ដូច​ជា Stuttgart, Hannover, Hoffenheim, Schalke04 និង RB Leipzig ជាដើម​៕

​អត្ថបទ​៖​នាង សុភា​វុ​ធ