ជាការឆ្លើយតបនឹងសេចក្តីប្រកាសរបស់ក្រុមអាជ្ញាធរសុខភាពប៉ាឡេស្ទីនថា យុទ្ធនាការសឹករបស់អ៊ីស្រាអែលនៅតំបន់ហ្កាហ្សា បានសម្លាប់មនុស្សជាង ៥ម៉ឺននាក់នោះ លោក Mahmoud Al-Ferra គឺជាជនប៉ាឡេស្ទីនជម្លៀសខ្លួនម្នាក់ និយាយថា ហ្កាហ្សាឈរតែម្នាក់ឯងគត់ ។

ចំណែកឯលោក Ahmed Ouda គឺជាពលរដ្ឋហ្កាហ្សាជម្លៀសខ្លួនម្នាក់ទៀត និយាយដែរថា ពួកយើងគឺជាមនុស្ស ពួកយើងគ្មានកំហុស តើឧក្រិដ្ឋកម្មអ្វីដែលពួកយើងធ្វើ ចំពោះការបាត់បង់ទុក្ករបុគ្គល ៥ម៉ឺននាក់ ឬ ៦ម៉ឺននាក់? ពួកយើងស៊ូទ្រាំច្រើនណាស់ ពួកយើងចង់សម្រាក ពួកយើងចង់រស់នៅលើដែនដីរបស់ពួកយើង ពួកយើងចង់ស្រួល ។

ក្រោយស្ងប់ស្ងាត់អស់រយៈពេល ២ខែនៃសង្រ្កាម ពលរដ្ឋហ្កាហ្សា បានជម្លៀសខ្លួនម្តងទៀត ដើម្បីជីវិតរស់រានរបស់ពួកគេ ក្រោយអ៊ីស្រាអែលបោះបង់ចោលបទឈប់បាញ់ បើកការវាយប្រហារថ្មីពេញទំហឹងទាំងច្រកអាកាស និងជើងគោក លើក្រុមហាម៉ាសកាលពីថ្ងៃអង្គារ ។

ការផ្ទុះគ្រាប់បានបន្ទរទូទាំងតំបន់ភាគខាងជើង តំបន់ភាគកណ្តាល និងតំបន់ភាគខាងត្បូងហ្កាហ្សាស្រ្ទីប កាលពីព្រឹកថ្ងៃអាទិត្យ ពេលដែលយន្តហោះចម្បាំងអ៊ីស្រាអែល ទម្លាក់គ្រាប់បែកលើគោលដៅជាច្រើន ។

ក្រុមអាជ្ញាធរសុខភាពប៉ាឡេស្ទីននិយាយថា មនុស្សយ៉ាងហោច ៣០នាក់ ត្រូវបានសម្លាប់នៅក្នុងការវាយប្រហាររបស់អ៊ីស្រាអែលលើទីក្រុង Rafah និងទីក្រុង Khan Younis កាលពីថ្ងៃអាទិត្យ ។ 

ដោយឡែក ក្រុមគ្រូពេទ្យបឋមនិយាយថា មនុស្សដែលត្រូវបានសម្លាប់ទាំងនោះ រួមទាំងបុគ្គលិកសាលាក្រុង ៣នាក់ផងដែរ ។

នាយករដ្ឋមន្រ្តីអ៊ីស្រាអែលលោក Benjamin Netanyahu និយាយម្តងហើយម្តងទៀតថា គោលបំណងសំខាន់នៃសង្រ្គាមមួយនេះ គឺដើម្បីកម្ទេចក្រុមហាម៉ាស់ឲ្យអស់ដែលជាអង្គភាពយោធា និងគ្រប់គ្រង ៕