ក្រុមប្រឹក្សាសិទ្ធិមនុស្សអង្គការសហប្រជាជាតិ ត្រូវបានគេរំពឹងថា នឹងដោះស្រាយការព្រួយបារម្ភ ជុំវិញការបញ្ជូនកងទ័ពកូរ៉េខាងជើង ទៅកាន់ប្រទេសរុស្ស៊ី ដើម្បីគាំទ្រសង្រ្គាមរបស់ខ្លួន នៅក្នុងប្រទេសអ៊ុយក្រែន នៅក្នុងសេចក្តីសម្រេចចុងក្រោយរបស់ខ្លួន ស្តីពីស្ថានភាពសិទ្ធិមនុស្សរបស់ទីក្រុងព្យុងយ៉ាង។

ការិយាល័យឧត្តមស្នងការសិទ្ធិមនុស្ស បានបង្ហាញសេចក្តីព្រាងសេចក្តីសម្រេចស្តីពីស្ថានភាពសិទ្ធិមនុស្សនៅក្នុងប្រទេសកូរ៉េខាងជើង ដែលត្រូវបានដាក់ជូនដោយប្រទេសប៉ូឡូញ និងអូស្ត្រាលី កាលពីថ្ងៃព្រហស្បតិ៍។

សេចក្តីព្រាងសេចក្តីសម្រេចនេះ ជំរុញឲ្យកូរ៉េខាងជើង «បញ្ឈប់ការប្រើប្រាស់កម្លាំងដ៏សាហាវ និងហួសហេតុផ្សេងទៀត នៅតាមព្រំដែនរបស់ខ្លួន និងកន្លែងផ្សេងទៀត ជាពិសេសកន្លែង ដែលវានឹងធ្វើឲ្យជនស៊ីវិលកាន់តែរងទុក្ខធ្ងន់ធ្ងរ បង្កឲ្យមានការរំលោភសិទ្ធិមនុស្ស និងធ្វើឲ្យសន្តិសុខអន្តរជាតិ មានអស្ថិរភាព»។

ខណៈពេលដែលសេចក្តីសម្រេចកន្លងទៅ បានអំពាវនាវឲ្យទីក្រុងព្យុងយ៉ាងអនុវត្តការអត់ធ្មត់ ក្នុងការប្រើប្រាស់កម្លាំងនៅតាមព្រំដែនរបស់ខ្លួន និងលើសពីនេះ សេចក្តីព្រាងនៅឆ្នាំនេះ បង្ហាញយ៉ាងច្បាស់ពីការព្រួយបារម្ភអំពីផលប៉ះពាល់ដែលអាចកើតមានលើសន្តិសុខពិភពលោក។