បាល់ឱប៖ ដោយទទួលបានការគាំទ្រពីក្រសួងអប់រំ យុវជន និងកីឡា សហព័ន្ធកីឡាបាល់ឱបកម្ពុជាបានរៀបចំវគ្គបណ្ដុះបណ្ដាល មន្ដ្រីបច្ចេកទេសរៀបចំការប្រកួតជំនាន់ទី១ ប្រចាំឆ្នាំ២០២១ លើកដំបូងរយៈពេល ៥ថ្ងៃដែលទើបបញ្ចប់ដោយជោគជ័យកាលពីល្ងាចថ្ងៃទី២៩ ខែវិច្ឆិកា ឆ្នាំ២០២១។
លោក ទុយ ប៊ុនហឿន អនុប្រធាននាយកដ្ឋានអប់រំកាយ និងកីឡា បានកោតសរសើរចំពោះសហព័ន្ធខិតខំរៀបចំនូវវគ្គបណ្ដុះបណ្ដាលផ្សេងៗ ជាក់ស្ដែងវគ្គមន្ដ្រីបច្ចេកទេសរៀបចំការប្រកួតនេះ ដើម្បីរួមចំណែកជំរុញការអភិវឌ្ឍវិស័យកីឡាជាតិ ស្របតាមកំណែទម្រង់យុទ្ធសាស្ដ្ររបស់រាជរដ្ឋាភិបាលក៏ដូចជាក្រសួងអប់រំ ដើម្បីត្រៀមដំណើរឆ្ពោះទៅធ្វើម្ចាស់ផ្ទះព្រឹត្តិការណ៍ស៊ីហ្គេមឆ្នាំ២០២៣។ លោក លន់ សាមឌី អនុប្រធានសហព័ន្ធកីឡាបាល់ឱបកម្ពុជាបានបញ្ជាក់ថា នេះគឺជាវគ្គមួយថ្មីដែលសហព័ន្ធរៀបចំឡើងក្នុងគោលបំណងជំរុញ និងលើកទឹកចិត្តឲ្យសិក្ខាកាមមានលទ្ធភាព ឈានទៅរៀបចំការប្រកួតដោយខ្លួនឯងនៅតាមមូលដ្ឋានរៀងៗខ្លួន ដើម្បីបំផុសកម្មភាពកីឡានេះឲ្យមានការចូលរួមកាន់តែច្រើន ហើយឆ្លៀតឱកាសចម្រាញ់ធនធានកីឡាករ-កីឡាការិនីត្រៀមចូលរួមការប្រកួតអន្ដរជាតិនានា។ យោងតាមរបាយការណ៍របស់អគ្គលេខាធិការរងសហព័ន្ធលោក ផាន សុភា វគ្គនេះបានធ្វើឡើរយៈពេល ៥ថ្ងៃចាប់ពីថ្ងៃទី២៥ ដល់ថ្ងៃទី២៩ ខែវិច្ឆិកា ដោយមានការសិក្សាទាំងទ្រឹស្ដី និងការអនុវត្តផ្ទាល់ ក្នុងនោះមានសិក្ខាកាមចំនួន ២៥នាក់មកពីបណ្ដាខេត្ត និងក្លិបចំនួន ៨ ចូលរួម៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
